AI-ով աշխատող առողջապահական հարթակ Docus AI-ը հայտարարել է «Աստղիկ» բժշկական կենտրոնի հետ համագործակցության մեկնարկի մասին։
Ընկերության հաղորդմամբ՝ այս համագործակցությունը հնարավորություն կտա Docus AI-ի լուծումներն ինտեգրել բժշկական կենտրոնի ամենօրյա ախտորոշիչ գործընթացներին՝ նպաստելով լաբորատոր աշխատանքների ավելի խելացի և փոխկապակցված կազմակերպմանը։
Docus AI-ը նշել է, որ սա ևս մեկ քայլ է արհեստական բանականության վրա հիմնված ախտորոշման լուծումների զարգացման և առողջապահական ոլորտում դրանց կիրառման ընդլայնման ուղղությամբ։
Docus.ai-ի առանցքային լուծումը արհեստական բանականությամբ աշխատող առողջապահական օգնականն է, որը նախատեսված է մարդկանց առողջական վիճակի վերաբերյալ ավելի տեղեկացված որոշումներ կայացնելու աջակցելու համար։ Հարթակը հնարավորություն է տալիս վերբեռնել և վերլուծել բժշկական փաստաթղթեր, ներկայացնել առողջական տվյալները, ինչպես նաև ստանալ հնարավոր ախտորոշումների և դրանց վերաբերյալ ամփոփ հաշվետվություններ։ Ընկերությունը մշտապես ընդլայնում է իր հնարավորությունները՝ ներդնելով նորարարական տեխնոլոգիաներ և համագործակցելով տարբեր մասնագիտությունների բժիշկների հետ։ Docus.ai-ի թիմի համոզմամբ՝ արհեստական բանականության զարգացումը կարող է էականորեն փոխել առողջապահության ոլորտը՝ բարձրացնելով ծառայությունների արդյունավետությունն ու հասանելիությունը։
