Henley Passport Index-ի 2025 թվականի հաշվետվության համաձայն՝ Միացյալ Նահանգների անձնագիրը առաջին անգամ երկու տասնամյակում դուրս է մնացել աշխարհի 10 ամենահզոր անձնագրերի ցանկից՝ զբաղեցնելով 12-րդ տեղը և կիսելով այն Մալայզիայի հետ։ Համեմատության համար՝ 2024-ի հունվարին ԱՄՆ անձնագիրը 7-րդն էր, իսկ 2025-ի հուլիսին՝ արդեն 10-րդը։ Ըստ նոր վարկանիշի՝ ամերիկյան անձնագրով հնարավոր է առանց վիզայի մուտք գործել 180 երկիր, մինչդեռ նախորդ ցուցակում այդ թիվը 188 էր։
Henley Passport Index-ը համարվում է աշխարհի անձնագրերի առավել հեղինակավոր և հին վարկանիշային համակարգը, որը ստեղծվել է Henley & Partners ընկերության կողմից՝ միջազգային ավիացիոն ասոցիացիայի (IATA) տվյալների հիման վրա։ Այն գնահատում է 199 անձնագրի շարժունակությունը 227 ուղղությամբ՝ հաշվի առնելով առանց վիզայի մուտքի, վիզա ստանալու տեղում (visa-on-arrival) կամ էլեկտրոնային թույլտվության (eTA) հնարավորությունները։
2024-ից մինչև 2025 թվականը համաշխարհային շարժունակության դինամիկան էականորեն փոխվել է։ Եթե 2024-ի ամենահզոր անձնագիրն էր Ֆրանսիան՝ 194 ուղղությամբ, ապա 2025-ին առաջին տեղում է Սինգապուրը՝ 193 ուղղությամբ։ Միացյալ Թագավորությունը կորցրել է 7 ուղղություն և իջել 4-րդից 8-րդ տեղ, իսկ Գերմանիան՝ 6 ուղղություն՝ անցնելով 2-րդից 4-րդ։ Միակ երկիրը, որը բարելավել է դիրքերը, Միացյալ Արաբական Էմիրություններն է՝ ավելացնելով մեկ նոր ուղղություն և բարձրանալով 11-րդ տեղից 8-րդ։
Ընդհանուր միտումը վկայում է շարժունակության կրճատման մասին նույնիսկ առավել զարգացած տնտեսությունների համար։ Աշխարհի ամենաթույլ անձնագրերի շարքում մնում են Աֆղանստանը, Պակիստանը, Եմենը, Իրաքը և Սիրիան, որոնց քաղաքացիները կարող են առանց վիզայի այցելել ընդամենը 20–30 երկիր։ Աֆղանստանի ցուցանիշը 2024-ի 28-ից իջել է 24՝ դարձնելով գլոբալ տարբերությունը առավել զգալի․ լավագույն և վատագույն անձնագրերի միջև այժմ կա 169 ուղղության տարբերություն։
Այսօր աշխարհի ամենաշարժունակ անձնագրերը պատկանում են Ասիական երկրներին․ Սինգապուրը զբաղեցնում է առաջին տեղը (193 երկիր), Հարավային Կորեան՝ երկրորդը (190 երկիր), իսկ Ճապոնիան՝ երրորդը (189 երկիր)։ Եվրոպական առաջատարների թվում են Գերմանիան, Իտալիան և Շվեյցարիան՝ 188 ուղղությամբ։ Աֆրիկայում առաջին տեղում է Սեյշելները՝ 155 ուղղությամբ, որին հաջորդում են Մավրիտանիան (148) և Հարավաֆրիկյան Հանրապետությունը (102)։
Հայաստանի անձնագրի դիրքը գլոբալ շարժունակության վարկանիշում նվազել է։ 2024 թվականի հունվարին Հայաստանը զբաղեցնում էր 74-րդ տեղը և հնարավորություն էր տալիս առանց նախնական վիզայի մուտք գործել 68 երկիր։ Սակայն 2025 թվականի հոկտեմբերյան ցուցակում Հայաստանը հայտնվել է 76-րդ հորիզոնականում, իսկ առանց վիզայի մուտքի ուղղությունների թիվը նվազել է՝ հասնելով 67-ի։
Ինդեքսը ցույց է տալիս, թե ինչպես են դիվանագիտական, անվտանգության և միգրացիոն քաղաքականությունները վերաձևում միջազգային ազատ տեղաշարժի աշխարհաքարտը։
