Էլեկտրոնային առևտրի ոլորտում չինական հսկա Alibaba-ն հանրությանը ներկայացրել է տեսանյութերի և նկարների ստեղծման իր AI մոդելը՝ Wan 2.1-ը: Այս քայլով ընկերությունը նպաստեց AI-ի ոլորտում մրցակցության աճին:
AI մոդելների ամենահայտնի խաղացողներից մեկը DeepSeek ստարտափն է: Alibaba-ն իր հերթին թողարկել է Wan 2.1-ի չորս տարբերակ՝ T2V-1.3B, T2V-14B, I2V-14B-720P և I2V-14B-480P, որոնք ստեղծում են տեսանյութ և ստատիկ պատկերներ՝ հիմնվելով տեքստային հարցման կամ նմուշի վրա, որը կարող է լինել պատկեր:
Ավելի փոքր T2V-1.3B մոդելը գործելու համար պահանջում է ընդամենը 8,19 ԳԲ տեսահիշողություն, ինչը համատեղելի է սպառողական շատ գրաֆիկական քարտերի հետ:
Մշակողները պնդում են, որ այս մոդելը կարող է 5 վայրկյան տևողությամբ տեսանյութ ստեղծել 480p-ով GeForce RTX 4090-ում՝ մոտ 4 րոպեում (առանց օպտիմալացման):
Մոդելները հասանելի են ամբողջ աշխարհի օգտատերերին HuggingFace և ModelScope (Alibaba Cloud-ի մաս) հարթակներում՝ ակադեմիական, հետազոտական և կոմերցիոն նպատակներով: Alibaba-ն հունվարին ներկայացրեց AI տեսաստեղծող իր մոդելի վերջին տարբերակը, որը սկզբում կոչվում էր Wanx, բայց հետագայում վերանվանվեց Wan: Նախագիծը բարձր գնահատականներ է ստացել Vbench-ի թեստերում, որոնք նախատեսված են վիդեո գեներատորների համար, մասնավորապես՝ այն դարձել է առաջատար՝ օբյեկտների փոխազդեցության չափանիշով։
Երեկ Alibaba-ն թողարկեց նաև QwQ-Max հիմնավորման մոդելի նախնական տարբերակը, որը նույնպես կթողարկվի որպես բաց կոդով նախագիծ՝ ավելի ուշ:
Ընկերությունը նախատեսում է ներդնել առնվազն 380 միլիարդ յուան (52 միլիարդ դոլար) առաջիկա երեք տարվա ընթացքում՝ ամպային հաշվարկների և AI ենթակառուցվածքին աջակցելու համար:
