Հայաստանի հրեշտակ ներդրողների ակումբը հայտարարել է նոր ներդրման մասին՝ տվյալների վերլուծության ոլորտում գործող Exorde Labs ստարտափում։
Exorde Labs-ը մշակում է տվյալների ինտելեկտուալ հարթակ, որը իրական ժամանակում հավաքում և վերլուծում է սոցիալական մեդիայի և լրատվական հարթակների միլիարդավոր հրապարակումներ՝ դրանք վերածելով գործնական տվյալների։ Ստարտափի տեխնոլոգիան թույլ է տալիս ոչ միայն հասկանալ, թե ինչ է քննարկվում գլոբալ մակարդակում, այլև վերլուծել հանրային տրամադրությունները տարբեր թեմաների, բրենդների կամ իրադարձությունների շուրջ։
Սկզբնական շրջանում կենտրոնանալով սոցիալական մեդիայի անալիտիկայի վրա՝ թիմը հայտնաբերել է ավելի խորքային խնդիր՝ լայնածավալ տվյալների հավաքման և մշակման ենթակառուցվածքների բացակայությունը։ Այդ խնդրի լուծման արդյունքում Exorde Labs-ի տեխնոլոգիան այսօր կիրառվում է տարբեր ոլորտներում՝ աջակցելով տվյալների վրա հիմնված որոշումների կայացմանը։
AICA-ն հայտնում է, որ ուրախ է միանալ Exorde Labs-ի զարգացման ճանապարհին և ընդգրկել ստարտափը իր ներդրումային պորտֆելում։
