OpenAI-ը ներկայացրել է GPT-Live-ը՝ ձայնային նոր մոդելների սերունդ, որի նպատակն է ChatGPT-ի հետ խոսակցությունը դարձնել ավելի արագ և մարդկային։
GPT-Live-ը կարող է միաժամանակ լսել և խոսել։ Սա նշանակում է, որ օգտատերը կարող է ընդհատել, դադար տալ կամ մտածել, իսկ համակարգը կշարունակի հետևել խոսակցության ընթացքին՝ առանց անտեղի միջամտելու։ GPT-Live-ը կարող է նաև արձագանքել կարճ արտահայտություններով, օրինակ՝ «հա», «հասկացա» կամ «լսում եմ», որպեսզի զրույցը ավելի բնական զգացվի։
Նոր մոդելը նախատեսված է ChatGPT Voice-ի համար։ OpenAI-ը նշում է, որ ձայնային ռեժիմն այժմ կկարողանա ավելի ճիշտ աշխատել աղմկոտ միջավայրում։
GPT-Live-ի կարևոր առանձնահատկություններից մեկն այն է, որ այն կարող է բարդ հարցերի դեպքում դիմել ավելի հզոր մոդելի օգնությանը։ Օրինակ, եթե հարցը պահանջում է որոնում, վերլուծություն կամ երկար մտածելու աշխատանք, GPT-Live-ը կարող է այդ գործընթացը փոխանցել GPT-5.5-ին, իսկ զրույցը չընդհատել։
GPT-Live-ը հասանելի է երկու տարբերակով՝ GPT-Live-1 և GPT-Live-1 mini։ Առաջինը նախատեսված է Go, Plus և Pro օգտատերերի համար, իսկ mini տարբերակը՝ Free օգտատերերի համար։
Նոր ChatGPT Voice-ը նաև կկարողանա ցույց տալ վիզուալ պատասխաններ՝ օրինակ եղանակի, սպորտային խաղերի, բաժնետոմսերի կամ այլ թեմաների վերաբերյալ քարտերի տեսքով։ Սա օգտատերերին թույլ կտա ոչ միայն լսել պատասխանը, այլ նաև արագ տեսնել կարևոր տեղեկությունը էկրանին։
OpenAI-ը նաև ընդգծում է անվտանգության հարցը։ Ընկերության խոսքով՝ GPT-Live-ը ստացել է լրացուցիչ անվտանգության ուսուցում, այդ թվում՝ ինքնավնասման, հոգեբանական զգայուն իրավիճակների, բռնության և սեռական բովանդակության ռիսկերի ուղղությամբ։ Ձայնային ռեժիմում համակարգը կարող է նաև իրական ժամանակում դադարեցնել կամ փոխել պատասխանը, եթե այն գնահատվի վտանգավոր։
GPT-Live-ը սկսում է հասանելի դառնալ ChatGPT-ի օգտատերերին iOS-ում, Android-ում և ChatGPT.com-ում։ Ընկերությունը նշում է, որ մոդելը դեռ կարող է որոշ լեզուներով խոսել ոչ բնական առոգանությամբ կամ ունենալ սահունության սահմանափակումներ, սակայն աշխատանքները շարունակվում են։
