Հեռահաղորդակցության շաբաթ 2026

Մարտի 23-ից 27-ը Երևանում կանցկացվի հեռահաղորդակցության ոլորտի խոշոր միջոցառումը՝ «Հեռահաղորդակցության շաբաթ 2026» (Telecom Week Armenia 2026)։ Միջոցառումը միավորելու է հեռահաղորդակցության օպերատորների, պետական և կարգավորող մարմինների, ինչպես նաև միջազգային ու տեղական տեխնոլոգիական կազմակերպությունների և կրթական հաստատությունների ներկայացուցիչներին։

Շաբաթվա ընթացքում նախատեսված են պաշտոնական բացման արարողություն, կլոր սեղան քննարկումներ, աշխատաժողովներ և ոլորտային այցելություններ։ Միջոցառումների նպատակն է քննարկել հեռահաղորդակցության ոլորտի զարգացման առաջնահերթությունները, նորարարական լուծումները և թվային տեխնոլոգիաների ապագան։

Ծրագրում ընդգրկված են նաև Հեռահաղորդակցության միջազգային միության համաժողովը՝ «Արհեստական բանականությունը հանուն թվային աճի» թեմայով, քննարկումներ ցանցային օպերատորների զարգացման և մարտահրավերների շուրջ, ինչպես նաև երեխաների առցանց անվտանգության վերաբերյալ կլոր սեղան։

Բացի այդ, նախատեսվում են հեռահաղորդակցության ենթակառուցվածքների հետ ծանոթության օր և ակադեմիական օր, որոնք միտված են երիտասարդների և ուսանողների ներգրավմանը ոլորտում։

Միջոցառման կազմակերպիչների խոսքով՝ «Հեռահաղորդակցության շաբաթ 2026»-ը նպատակ ունի ստեղծել համագործակցության և մասնագիտական շփումների հարթակ, որտեղ կքննարկվեն ոլորտի ռազմավարական ուղղություններն ու Հայաստանի թվային ապագայի ձևավորման հնարավորությունները։

Մասնակցությունն անվճար է՝ նախնական գրանցմամբ։