Pantone Գույնի ինստիտուտը հրապարակել է 2026 թվականի գլխավոր գույնը՝ PANTONE 11-4201 Cloud Dancer՝ նուրբ, մեղմ սպիտակ երանգ, որը խորհրդանշում է մաքրություն, նոր գաղափարների համար մաքուր էջ և մտքի պարզություն։
Մաքրագույն սպիտակը, ըստ ինստիտուտի մասնագետների, դարձել է տարվա գույնը այն պայմաններում, երբ թվային աշխարհը ստեղծում է ինֆորմացիոն աղմուկ և հոգնածություն։ «Այս գույնը մարդկանց տալիս է ներդաշնակություն, թույլ է տալիս կանգ առնել, կենտրոնանալ և կտրվել քաոսային առօրյայից»,- CNN-ին ասել է ինստիտուտի գործադիր տնօրեն Լեատրիս Այզմանը։ Նրա խոսքով՝ Cloud Dancer-ը կապված է նոր մեկնարկների գաղափարի հետ և արտացոլում է «մաքուր սկզբի նկատմամբ մարդկանց ձգտումը»։
Pantone-ի թիմը գույնը ընտրում է՝ ուսումնասիրելով մշակութային, քաղաքական, դիզայներական միտումները։ 1999 թվականից գործող այս ծրագիրը փորձում է ցույց տալ, թե ինչպես են ժամանակի հանրային երևույթներն արտահայտվում գունային լեզվի միջոցով։ Գույնի ընտրության գործընթացում առանձնահատուկ ուշադրություն է դարձվում ոչ միայն երանգին, այլև անվանը։
«Գույնի անվանումը չափազանց կարևոր է. երբ լսում եք որևէ գույնի անուն, անմիջապես ձեր մտքում պատկեր է ստեղծվում», — նշել է Laurie Pressman-ը, ինստիտուտի փոխնախագահը՝ ընդգծելով, որ 2026-ի համար ընտրված սպիտակ երանգը հավասարապես միավորում է սառը և տաք ենթաերանգներ։
