Հայաստանի առաջին 1000 խոշոր հարկ վճարողները 2026 թվականի հունվար-հունիս ամիսներին պետական բյուջե են վճարել շուրջ 1,109.9 մլրդ դրամ (մոտ 1.1 տրիլիոն դրամ)։ Նախորդ տարվա նույն ժամանակահատվածի հետ համեմատ՝ վճարումներն աճել են 12.6%-ով, կամ շուրջ 123.8 մլրդ դրամով. 2025-ի առաջին կիսամյակում խոշոր հազարյակի ապահոված վճարը կազմել էր 986.1 մլրդ դրամ։
Ցուցակի առաջին տասնյակում աչքի են ընկնում հանքարդյունաբերության ոլորտի ընկերությունների վերելքը, առաջատար բանկերի ներխուժումը տասնյակ, և շահումով խաղերի լուծումներ մշակող երկու ընկերությունների հավասար ընթացքը։
Թոփ-10 խոշոր հարկ վճարող ընկերությունները
| # | Ընկերություն | Վայրը | Վճարած հարկեր (մլրդ դրամ) | 2025-ի տեղը |
|---|---|---|---|---|
| 1 | Զանգեզուրի պղնձամոլիբդենային կոմբինատ | Սյունիք | 41.6 | 6 |
| 2 | Մոբայլ Սենթր ԱՐԹ | Երևան | 38.2 | 1 |
| 3 | Արդշինբանկ | Երևան | 33.6 | 4 |
| 4 | Գազպրոմ Արմենիա | Երևան | 31.5 | 3 |
| 5 | Գրանդ Տոբակո | Երևան | 29.0 | 2 |
| 6 | Ամերիաբանկ | Երևան | 22.2 | 5 |
| 7 | Դիջիթեյն | Երևան | 17.9 | 10 |
| 8 | Սոֆթ Կոնստրակտ | Երևան | 17.5 | 14 |
| 9 | Կապանի լեռնահարստացման կոմբինատ | Սյունիք | 15.7 | 12 |
| 10 | ԻՄՎԲԱՄ | Երևան | 13.9 | 29 |
| 11 | Ինտերնեյշնլ Մասիս Տաբակ | Արարատ | 13.3 | 8 |
| 12 | Ֆիլիպ Մորրիս Արմենիա | Երևան | 13.2 | 15 |
| 13 | Հայաստանի էլեկտրական ցանցեր | Երևան | 12.5 | 21 |
| 14 | Սիթի | Երևան | 12.4 | 13 |
| 15 | Կաբարկո | Երևան | 11.2 | 22 |
| 16 | Արմենիա միջազգային օդանավակայաններ | Երևան | 10.9 | 17 |
| 17 | Սի Փի Էս Էներջի Գրուպ | Երևան | 10.8 | 7 |
| 18 | ԱԿԲԱ բանկ | Երևան | 10.6 | 18 |
| 19 | Վիվա Արմենիա | Երևան | 10.4 | 11 |
| 20 | Ջեյ Թի Այ Արմենիա | Երևան | 8.4 | 34 |
Զանգեզուրը վերադարձել է առաջին հորիզոնական
Որոշ ժամանակ անց Զանգեզուրի պղնձամոլիբդենային կոմբինատը կրկին վերադարձել է ցուցակի առաջին հորիզոնական։ Անցյալ տարվա առաջին կիսամյակում կոմբինատը հետ էր մղվել վեցերորդ հորիզոնական, սակայն այս անգամ 41.6 մլրդ դրամ վճարմամբ վստահ զբաղեցրել է առաջին տեղը՝ գործնականում կրկնապատկելով իր անցյալ տարվա ցուցանիշը (+104%)։ Հանքարդյունաբերության վերականգնումը կիսամյակի ընդհանուր պատկերը ձևավորող կարևորագույն գործոններից է դառնում։
Մոբայլ Սենթրը պահում է բարձր դիրքը
Մոբայլ Սենթր ԱՐԹ-ը շարունակում է պահել առաջատար դիրքը՝ երկրորդ տեղում՝ 38.2 մլրդ դրամով (+15.9%)։ Ընկերությունը մնում է էլեկտրական սարքավորումների վերաարտահանման ալիքի հիմնական շահառուներից. հենց այս ուղղությունն է թույլ տալիս պահել գերբարձր վճարումների մակարդակը։
Բանկերը՝ տասնյակում և դրանից անմիջապես հետո
Բանկերը կրկինմտել են թոփ-10. Արդշինբանկը երրորդն է՝ 33.6 մլրդ դրամով (+20%), իսկ Ամերիաբանկը՝ վեցերորդը՝ 22.2 մլրդ դրամով։ Հենց այս երկու բանկերն են ապահովում հատվածի ներկայությունը լավագույն տասնյակում։
Հաջորդող բանկերը բաշխված են ցուցակի ողջ երկայնքով. ԱԿԲԱ բանկը՝ 18-րդ, Ինեկոբանկը՝ 21-րդ, Կոնվերս բանկը՝ 30-րդ, Էվոկաբանկը՝ 31-րդ, Այ Դի Բանկը՝ 34-րդ, ՎՏԲ-Հայաստանը՝ 37-րդ, Հայէկոնոմբանկը՝ 43-րդ, իսկ Արարատբանկը՝ 51-րդ հորիզոնականում։ Բանկերի մեծ մասն ամրապնդել է իր դիրքերը՝ մեկ տարում մի քանի աստիճան վեր բարձրանալով։
Դիջիթեյնն ու Սոֆթը՝ գրեթե հավասար
Շահումով խաղերի լուծումներ մշակող երկու ընկերությունները՝ Դիջիթեյնն ու Սոֆթ Կոնստրակտը, ընթանում են գրեթե ձեռք ձեռքի տված։ Դիջիթեյնը յոթերորդն է՝ 17.9 մլրդ դրամով (+62%), Սոֆթ Կոնստրակտը՝ ութերորդը՝ 17.5 մլրդ դրամով (+76%)։ Երկուսի միջև տարբերությունը կիսամյակի կտրվածքով ընդամենը մոտ 0.4 մլրդ դրամ է, և երկուսն էլ ցուցաբերում են ամենաարագ աճող տեմպերից մեկը լավագույն տասնյակում։
Հեռահաղորդակցության օպերատորները
Բջջային կապի օպերատորները տեղաբաշխված են ցուցակի միջին հատվածում։ Վիվա Արմենիան 19-րդն է՝ 10.4 մլրդ դրամով, ինչը գործնականում անփոփոխ է անցյալ տարվա համեմատ, թեև ընկերությունը ցուցակում մի քանի աստիճան իջել է։ Յուքոմը նկատելիորեն առաջ է շարժվել՝ 38-րդ տեղից բարձրանալով 27-րդ՝ 5.8 մլրդ դրամով (+27%)։ Տելեկոմ Արմենիան (Team) 35-րդ հորիզոնականում է՝ 4.8 մլրդ դրամով։
