YouTube-ն ունի արհեստական բանականությամբ աշխատող նոր գործառույթ: Այն նախատեսված է կարճ տեսանյութեր ստեղծելու համար, որոնք օգտատերերը կարող են հրապարակել Shorts-ում: Խոսքը YouTube Dream Screen գործիքի մասին է, որը կառուցված է Google Veo 2-ի վրա։ Այս ֆունկցիան նախկինում էլ էր թույլ տալիս տեքստային նկարագրության հիման վրա տեսանյութեր ստեղծել, սակայն մինչ այդ օգտատերերը կարող էին դրանք օգտագործել միայն որպես ֆոն։
Նոր գործիքը փորձելու համար օգտատերը պետք է ակտիվացնի տեսախցիկը Shorts-ով, գործարկի Dream Screen ֆունկցիան, բացի մեդիա ընտրության վահանակը և սեղմի «Ստեղծել» կոճակը: Դրանից հետո պետք է մուտքագրել ապագա տեսանյութի տեքստային նկարագրությունը, ինչպես նաև ընտրել առկա ոճերից, ոսպնյակներից, կինոէֆեկտներից որևէ մեկ՝ նշելով տեսանյութի տևողությունը։
YouTube-ը հայտնել է, որ AI-ի ստեղծած տեսանյութերը Shorts-ում հրապարակելու հնարավորությունը այս շաբաթ հասանելի կլինի ԱՄՆ-ի, Կանադայի, Ավստրալիայի և Նոր Զելանդիայի օգտատերերին: Ավելի ուշ այն հասանելի կդառնա նաև այլ երկրներում, սակայն հստակ ժամկետներ չեն նշվում:
Ըստ YouTube-ի՝ նեյրոնային ցանցի ինտեգրումը Dream Screen ֆունկցիայի հետ թույլ կտա ավելի արագ ստեղծել «մանրակրկիտ և իրատեսական» տեսանյութեր՝ հաշվի առնելով իրական աշխարհի ֆիզիկան և մարդկանց բնական շարժումները։ Միևնույն ժամանակ, AI-ի օգնությամբ ստեղծված տեսանյութերը կնշվեն ինչպես տեսանելի տեսողական պիտակներով, այնպես էլ անտեսանելի Google SynthID ջրանիշներով՝ ցույց տալով, որ տեսանյութը ստեղծվել կամ փոփոխվել է նեյրոնային ցանցի միջոցով։
