Դեռ 2021-ին WhatsApp-ը հաղորդագրությունների գաղտնիության պաշտպանության ևս մեկ շերտ ավելացնելու համար գործարկել էր «Մեկանգամյա դիտում» լուսանկարների և տեսանյութերի համար։ Այժմ սոցցանցը հայտարարում է նույն գործառույթի գործարկման մասին, սակայն այս անգամ ձայնային հաղորդագրությունների համար. դրանք կանհետանան անմիջապես լսելուց հետո:
Այս գործառույթը կարող է օգտակար լինել տարբեր իրավիճակներում: Օրինակ, եթե ցանկանում եք ընկերոջը թելադրել կրեդիտ քարտի մանրամասները կամ պատրաստվում եք անակնկալ մատուցել, ձայնային հաղորդագրությունների միջոցով կարևոր տեղեկությունների փոխանակումն ավելի անվտանգ է դարձել: Ինչպես լուսանկարներն ու տեսանյութերը մեկանգամյա դիտման ժամանակ, նման ձայնային հաղորդագրությունները նույնպես նշվում են հատուկ պատկերակով, որը զգուշացնում է, որ ձայնագրությունը կարելի է լսել միայն մեկ անգամ:
WhatsApp-ի բոլոր անձնական հաղորդագրությունները, ներառյալ ձայնային հաղորդագրությունները, գաղտնագրված են «ծայրից ծայր»:
Մեկանգամյա ձայնային հաղորդագրությունները հասանելի կլինեն ամբողջ աշխարհում առաջիկա մի քանի օրվա ընթացքում։
Միացե՛ք How2B-ի Տելեգրամյան ալիքին՝ ամենահետաքրքիր հոդվածներն ու նորությունները բաց չթողնելու համար:
