S&P 500 ինդեքսը համաշխարհային ֆինանսական շուկայի վիճակը գնահատելու ամենակարևոր ցուցիչներից մեկն է։ Անկախ նրանից՝ նոր եք սկսում կառուցել ներդրումային պորտֆել, թե արդեն մեծ փորձ ունեք, S&P 500 ինդեքսի մասին գիտելիքները կարող են ամուր հիմքեր ստեղծել երկարաժամկետ հաջողության համար:
Ի՞ՆՉ Է S&P 500 ԻՆԴԵՔՍԸ
S&P 500-ը (Standard & Poor’s 500) ներկայացնում է Ամերիկայի Միացյալ Նահանգների 500 ամենախոշոր և հայտնի ընկերությունները։ Սա մի ցուցակ է, որը հետևում է այդ ընկերությունների բաժնետոմսերի արժեքի փոփոխություններին։
Այն ներառում է համաշխարհային այնպիսի անուններ, ինչպիսիք են Apple-ը, Amazon-ը, Microsoft-ը, Coca-Cola-ն, Netflix-ը և մի շարք ընկերություններ: Այս ընկերությունները տարբեր ոլորտների ներկայացուցիչներ են՝ տեխնոլոգիաներ, առողջապահություն, սպառողական ապրանքներ, ֆինանսական ծառայություններ և այլն: Ներառման իրավունք ստանալու համար ընկերությունը պետք է համապատասխանի խիստ չափանիշների, այդ թվում՝ գրանցված լինի ԱՄՆ-ում և ունենա առնվազն 14,5 միլիարդ դոլար շուկայական արժեք: Եթե ընկերությունն այլևս չի համապատասխանում չափանիշներին, այն կարող է հեռացվել ինդեքսից:
S&P 500-ը կազմված է այնպիսի ընկերություններից, որոնք միասին կազմում են ԱՄՆ ֆոնդային շուկայի գրեթե 80%-ը։ Դրա շնորհիվ այն լավ պատկերացում է տալիս՝ ինչ վիճակում է ամբողջ շուկան։
ԿԱՐՈ՞Ղ ԵՔ ՆԵՐԴՐՈՒՄՆԵՐ ԿԱՏԱՐԵԼ S&P 500-ՈՒՄ
Դուք չեք կարող ուղղակի ներդրում կատարել ինդեքսում, որովհետև ինդեքսը պարզապես ցուցիչ է։ Ներդրումներ կարող եք կատարել՝ օգտագործելով այն հիմնադրամները կամ գործիքները, որոնք հետևում են այդ ինդեքսին։
1. Ինդեքսային ֆոնդեր և ETF
Սրանք հատուկ ֆինանսական գործիքներ են, որոնք կազմված են S&P 500-ում ընդգրկված բոլոր կամ մեծ մասի բաժնետոմսերից։ Երբ դուք ներդրում եք կատարում այս ֆոնդերից մեկում, ըստ էության ներդրում եք անում ամբողջ ինդեքսում։
*Ինդեքսային ֆոնդեր. այս ֆոնդերը սովորաբար հասանելի են կենսաթոշակային հաշիվների կամ ներդրումային հարթակների միջոցով։
*ETF-ներ. Վաճառվում են բաժնետոմսերի նման։ Դրանք կարելի է գնել կամ վաճառել ամբողջ օրվա ընթացքում: Ամենահայտնիներն են՝
- SPDR S&P 500 ETF (SPY)
- Vanguard S&P 500 ETF (VOO)
- iShares Core S&P 500 ETF (IVV)
Կան նաև ոլորտային ETF-ներ՝ կենտրոնացած, օրինակ՝ միայն տեխնոլոգիական կամ առողջապահական ընկերությունների վրա։
Այս միջոցները իդեալական են սկսնակների համար, քանի որ.
- դիվերսիֆիկացված են (այսինքն՝ գումարը բաշխվում է շատ ընկերությունների վրա),
- ծախսերը համեմատաբար ցածր են
- չեն պահանջում մասնագիտական վերլուծություններ
- հասանելի են գրեթե բոլոր բրոքերային հարթակներով։
2. Անհատական բաժնետոմսեր
Եթե ուզում եք ներդրում կատարել կոնկրետ ընկերությունում, օրինակ՝ Microsoft-ում կամ Amazon-ում, ապա կարող եք գնել հենց այդ ընկերության բաժնետոմսերը։ Բայց այս տարբերակը նշանակում է, որ դուք պետք է ինքներդ որոշեք՝ որ ընկերությունն ընտրել, և հետևեք դրա գործունեությանը։ Սակայն պետք է հիշել, որ այս դեպքում ձեր պորտֆելն ինքնաբերաբար չի դիվերսիֆիկացվում և մեծանում է ռիսկը:
ԱՐԴՅՈ՞Ք S&P 500-Ը ՎՃԱՐՈՒՄ Է ՇԱՀԱԲԱԺԻՆՆԵՐ
Ինդեքսը՝ որպես ցուցիչ, շահաբաժին չի վճարում։ Բայց այդ ինդեքսում ընդգրկված շատ ընկերություններ վճարում են։ Եթե դուք ներդրումներ եք կատարում փոխադարձ ֆոնդի կամ ETF-ի միջոցով, որտեղ պահպանվում են շահաբաժիններ վճարող բաժնետոմսեր, դուք կստանաք շահաբաժիններ՝ հիմնված ձեզ պատկանող ֆոնդի բաժնետոմսերի քանակի վրա:
ԽՈՐՀՈՒՐԴՆԵՐ ՆԵՐԴՐՈՒՄՆԵՐ ԿԱՏԱՐԵԼՈՒՑ ԱՌԱՋ
• Մտածեք երկարաժամկետ եկամուտ ստանալու մասին. S&P 500-ում ներդրումներ կատարելը, որպես կանոն, լավագույնս համապատասխանում է 5 կամ ավելի տարի ժամկետով ներդրում կատարել ցանկացողներին:
• Ստեղծեք «շտապ օգնության» հիմնադրամ. սա ձեզ կօգնի չվաճառել բաժնետոմսերը շուկայի անկման ժամանակ:
• Հաշվի առեք ռիսկերը. ներդրումների արժեքները կարող են աճել և նվազել: Վերջնարդյունքում դուք կարող եք ձեր կտարած ներդրումից ավելի քիչ ստանալ:
• Սկսեք նպատակների հստակ ձևակերպումից. նախքան ներդրումներ կատարելը հաշվի առեք ձեր ֆինանսական նպատակները և ռիսկերի հանդուրժողականությունը:
ԵԶՐԱԿԱՑՈՒԹՅՈՒՆ
S&P 500-ը հնարավորություն է տալիս ներդրումներ կատարել աշխարհի ամենամեծ և կայուն ընկերությունների մեջ՝ միաժամանակ դիվերսիֆիկացնելով ռիսկերը։ Անկախ նրանից՝ ընտրում եք ETF, ինդեքսային ֆոնդ, թե առանձին բաժնետոմսեր, սա հիանալի մեկնարկ է ներդրումային ճանապարհի համար։
Ներդրումներ կատարելու համար կարող եք բացել անվճար բրոքերային հաշիվ Unibank Invest-ի միջոցով։ Unibank Invest հավելվածը թույլ է տալիս մուտք գործել աշխարհի խոշորագույն բորսաներ և ձեռք բերել միջազգային ներդրումային գործիքներ, ինչպիսիք են բաժնետոմսերը, պարտատոմսերը և ETF-երը։
