Ուզբեկական BYD Uzbekistan Factory ձեռնարկությունը ձեռնարկում է՝ առաջին էլեկտրական մեքենաների արտադրությունը՝ Չինաստանի հետ համատեղ: 160 միլիոն դոլար արժողությամբ գործարանը, որը գործարկվել է այս տարվա հունվարին, ունի տարեկան 50 հազար էլեկտրական մեքենա արտադրելու հզորություն: Ներկայումս արտադրվում են Chazor և Song Plus Champion մոդելները, սակայն առաջիկա տարիներին նախատեսվում է ընդլայնել տեսականին:
Նախագիծը հավակնոտ զարգացման ծրագիր ունի: Երկրորդ փուլում 300 միլիոն դոլարի ներդրմամբ նախատեսվում է արտադրությունը հասցնել տարեկան 200 հազար մեքենայի, իսկ երրորդ փուլում՝ 500 միլիոն դոլարի ներդրմամբ, հասնել մինչև 500 հազար մեքենայի: Գործարանը զինված է ժամանակակից սարքավորումներով և ռոբոտային համակարգերով, իսկ արտադրության գործընթացը լիովին ավտոմատացված է: Բացի այդ, ստեղծվել է փորձարկման լաբորատորիա՝ որակի բարձր չափանիշներ ապահովելու համար:
Նախագիծը ոչ միայն տնտեսական, այլև սոցիալական մեծ նշանակություն ունի Ուզբեկստանի համար: Ներկայումս գործարանում աշխատում է 1200 մարդ, իսկ երեք փուլերի ավարտից հետո աշխատատեղերի թիվը կհասնի 10 հազարի: Ուշագրավ է, որ ընկերությունը մեծ ուշադրություն է դարձնում կադրերի պատրաստմանը. միայն անցյալ տարի 200 աշխատակից վերապատրաստվել է UzAuto Motors գործարաններում, իսկ այս տարի ևս 92 մասնագետ կմեկնի Չինաստան՝ վերապատրաստման: Այս նախաձեռնությունը կարող է էապես փոխել ոչ միայն Ուզբեկստանի, այլև ողջ տարածաշրջանի ավտոմոբիլային շուկան՝ նպաստելով էկոլոգիապես մաքուր տրանսպորտի զարգացմանը:
Կհիմնադրվի բամպերների, ապակիների, լաքապատ և պլաստմասե մասերի արտադրություն: Հետագայում նախատեսվում է արտադրել մարտկոցներ, էլեկտրաշարժիչներ, ալյումինե դետալներ, անվադողեր ու նստատեղեր: Այսօր, ըստ ուզբեկական լրատվամիջոցների, ընկերությունը հաստատել է թափքի դրոշմավորման, եռակցման և ներկման աշխատանքները, իսկ բաղադրիչների մեծ մասը ներմուծվում է Չինաստանից:
Կարդացեք նաև՝
- Հայաստանն էլեկտրոմոբիլների ներկրման արտոնությունների երկարաձգում կառաջարկի նաև 2026-ից հետո
- Էլեկտրական մեքենաները 30%-ով ավելի շատ են աղտոտում օդը՝ անվադողերի մաշվածության մակարդակով
Միացե՛ք How2B-ի Տելեգրամյան ալիքին՝ ամենահետաքրքիր հոդվածներն ու նորությունները բաց չթողնելու համար:
