BANA Angels-ի հրեշտակ ներդրողների պատվիրակությունը Բելգիայի մայրաքաղաք Բրյուսելում մասնակցել է Եվրոպայի ամենամեծ միջոցառումներից մեկին հրեշտակային ներդրումների ոլորտում՝ Եվրոպական հրեշտակային ներդրումային գագաթնաժողովին (European Angel Investment Summit): Միջոցառմանը մասնակցել են ներդրողներ, ձեռնարկատերեր, ներկայացուցիչներ աշխարհի տարբեր երկներից։ European Angel Investment Summit 2024-ը յուրահատուկ հարթակ էր՝ կապեր հաստատելու միջազգային գործընկերների հետ, ովքեր կյանքի են կոչում նորարարություններ:
Հայաստանը ներկայացրել է BANA Angels-ի 6 հոգանոց պատվիրակությունը։ BANA Angels-ի նախագահ և Formula VC-ի գլխավոր գործընկեր Գրիգոր Հովհաննիսյանը հանդես է եկել նաև որպես ժյուրիի անդամ Innovation Showcase-ի շրջանակում։
Հովհաննիսյանն անդրադարձել է Հայաստանի մասնակցության կարևորությանը` նշելով. «European Angel Investment Summit-ը հզոր հարթակ է նորարարության և ներդրումների համար, որը համախմբում է հրեշտակային ներդրումային համայնքի ամենապայծառ մտքերը։ Մեզ համար ոգեշնչող է տեսնել, թե ինչպես է մեր պատվիրակությունը ակտիվորեն նպաստում համաշխարհային նորարարության ապագային: Միջազգային գործընկերների հետ համագործակցելով՝ մենք ամրապնդում ենք հայկական ստարտափներին աջակցելու մեր կարողությունները և առաջարկում նրանց այն բոլոր գործիքներն ու կապերը, որոնք անհրաժեշտ են աշխարհում զարգանալու համար»:
