Եվրոպական The Exploration Company ընկերությունը ապագայում կարող է դառնալ ամերիկյան SpaceX-ի մրցակիցը՝ բեռները տիեզերք առաքելու ոլորտում, գրում է TechCrunch-ը։ Դրա համար այն մշակում է բազմակի օգտագործման Nyx տիեզերանավը, որը կկարողանա ուղեծիր դուրս գալ և Երկիր վերադարձնել մինչև 3 տոննա բեռ։ Ընկերությունը հանգանակել է 160 մլն դոլար՝ զարգանալու համար, ընդ որում ֆինանսավորման հիմնական մասը ստացվել է մասնավոր ներդրողներից:
Exploration ընկերությունը հիմնադրվել է օդատիեզերական ինժեներ Հելեն Հուբիի կողմից, 2021 թվականին: Nyx տիեզերանավի առաջին թռիչքը դեպի Միջազգային տիեզերակայան և հակառակ ուղղությամբ նախատեսված է 2028 թվականին։
«Մենք առաջին [տիեզերական] ընկերությունն ենք աշխարհում, որը հիմնականում ֆինանսավորվում է մասնավոր ներդրողների կողմից», – նշել է Հուբին՝ լրագրողների հետ զրույցում: Ըստ նրա՝ սա տարբերվում է SpaceX-ի Crew Dragon-ի մոտեցումից, որտեղ ֆինանսավորումը հիմնականում ստացվել է NASA-ի կողմից:
Ֆինանսավորման վերջին փուլը ստացվել է Balderton Capital-ից և Plural-ից: Ընդհանուր առմամբ, ստարտափին հաջողվել է հավաքել 208 մլն դոլար։ Exploration Company-ի ներդրողների թվում են նաև Bessemer Venture Partners-ը, NGP Capital-ը և երկու եվրոպական սուվերեն հիմնադրամներ՝ French Tech Souveraineté և Deep Tech & Climate Fonds:
Ստարտափը հրավիրել է Եվրոպական տիեզերական գործակալության (ESA) ուշադրությունը, որը գիտակցում է տարածաշրջանում արբանյակների և այլ բեռների տիեզերք առաքման հետ կապված ոլորտը զարգացնելու անհրաժեշտությունը։ Տարեսկզբին ընկերությունը 25 միլիոն եվրոյի պայմանագիր է կնքել՝ մշակելու համար դեպի Երկիր բեռներ տեղափոխելու տեխնոլոգիա։ Պայմանագրի ժամկետը լրանում է 2026 թվականին, սակայն այն կարող է երկարաձգվել։
ESA-ի նպատակն է առնվազն մեկ տիեզերանավ ուղարկել ՄՏԿ 2028 թվականին։
«Ես մեծ հարգանքով եմ վերաբերվում այն ամենին, ինչ անում է SpaceX-ը: Մենք փորձում ենք նրանցից հնարավորինս շատ սովորել, ոգեշնչված ենք նրանց հաջողություններով, սակայն կարծում ենք, որ աշխարհին մրցակցություն է պետք, և ուզում ենք քայլ առ քայլ այլընտրանք ստեղծել։ Մենք քաջ գիտակցում ենք, որ ավելի ուշ ենք սկսել, քիչ ենք և քիչ ռեսուրսներ ունենք, բայց ուզում ենք փորձել»,- ասել է օդատիեզերական ինժեներ Հելեն Հուբին։
