Nvidia-ի եկամուտը 2024 թվականի երրորդ եռամսյակում աճել է 94%-ով`2023 թվականի նույն ժամանակահատվածի համեմատ, և կազմել ռեկորդային 35,1 միլիարդ դոլար, ասվում է տեխնոլոգիական հսկայի զեկույցում: Դա պայմանավորված է ընկերության AI չիպերի մեծ պահանջարկով։
Ամենամեծ աճը ցույց է տվել Nvidia-ի եկամուտը տվյալների կենտրոններից. ցուցանիշն աճել է 112%-ով և կազմել 30,77 մլրդ դոլար՝ նախորդ տարվա հուլիս-սեպտեմբերի 14,51 դոլարի դիմաց: Ընկերությունը կանխատեսում է, որ իր եկամուտը 2024 թվականի չորրորդ եռամսյակում կաճի մինչև 37,5 միլիարդ դոլար:
Վերլուծաբանները ուշադիր հետևում են, թե ինչպես Nvidia-ի նոր սերնդի AI չիպերը, որոնք կոչվում են Blackwell, կարող են ազդել տեխնոլոգիական հսկայի մոտակա եկամուտների աճի վրա, և արդյո՞ք չիպերը կբախվեն մարտահրավերների, երբ թողարկվեն, նշում է Financial Times-ը: Նախկինում The Information-ը հայտնել էր, որ Blackwell-ը գերտաքանում է սերվերներին միանալիս:
Blackwell չիպերի մասին հայտարարվել է մարտին: Դրանք հիմնականում նախատեսված են արհեստական ինտելեկտի ոլորտում զարգացումների համար և կարող են երկու անգամ ավելի հզորություն ապահովել նեյրոնային ցանցերի վերապատրաստման համար՝ համեմատած ընթացիկ սերնդի չիպերի հետ:
Նոյեմբերի սկզբին Nvidia-ն դարձավ պատմության մեջ առաջին ընկերությունը, որի շուկայական կապիտալիզացիան գերազանցեց 3,6 տրիլիոն դոլարը: Reuters-ը նշել է, որ այս գումարն ավելին է, քան Netflix, Walmart, JPMorgan, Visa, Eli Lilly և UnitedHealth Group ընկերությունների արժեքը միասին վերցրած։
Տարեսկզբից տեխնոլոգիական հսկայի բաժնետոմսերն աճել են ավելի քան 200%-ով, գրում է FT-ն։ Այս ցուցանիշին նպաստել է AI տեխնոլոգիաների մշակման և ներդրման համար ընկերությունների միջև տեխնոլոգիական մրցավազքը, նշում է թերթը։ Հոդվածը գրելու պահին Nvidia-ի բաժնետոմսերը վաճառվում են մեկ բաժնետոմսի դիմաց 146,6 դոլարով:
