Օրեր առաջ կայացած Alternative Propulsion Conference-ում (APEC) NASA-ի վետերան և Exodus Propulsion Technologies-ի համահիմնադիր Չարլզ Բյուլերը հայտարարել է «նոր ուժի» հայտնաբերման մասին, որը կարող է տիեզերանավը շարժման մղել առանց զանգվածի արտանետման, այսինքն՝ առանց վառելիքի կամ աշխատանքային նյութի օգտագործման, եթե խոսքը իոնային (պլազմային) շարժիչների մասին է։ Եթե հայտնագործությունը հաստատվի, այն կփոխի տիեզերագնացության ոլորտը և ոչ միայն։
Չարլզ Բյուլերը ավելի քան երկու տասնամյակ աշխատել է NASA-ում՝ որպես էլեկտրաստատիկ մասնագետ: Նա մասնակցել է Space Shuttle, Hubble և ISS ծրագրերին։ Գործակալությունում իր կարիերայի սկզբում Բյուլերը ղեկավարում էր առանց վառելիքի հրթիռային շարժիչներ մշակող թիմ: Խմբի կողմից ստեղծված ուժային շարժիչը հիմնված է էլեկտրաստատիկ ճնշման անհամաչափության ֆենոմենի վրա։ Մինչև 2020 թվականը, այն ամենը, ինչի նրանք հասել էին, Երկրի վրա ձգողականության հարյուր հազարերորդից մի փոքր ավելի մեծ մղում ստեղծելն էր: Այնուամենայնիվ, վերջերս տեղի ունեցավ բեկում, և հնարավոր եղավ արտադրել երկրի ձգողականությանը համարժեք մղում, ինչը ապացուցեց գաղափարի խոստումնալից լինելը։
«Նոր ուժի» այս բացահայտումը հիմնարար է այն առումով, որ միայն էլեկտրական դաշտերը կարող են կայուն ազդեցություն ստեղծել օբյեկտի վրա և թույլ տալ, որ նշված օբյեկտի զանգվածի կենտրոնը շարժվի առանց զանգվածի տեղաշարժի», – ասել է Բյուլերը համաժողովում,- «Կան կանոններ, ներառյալ էներգիայի պահպանումը, բայց ճիշտ մոտեցման դեպքում հնարավոր է առաջացնել ուժեր, որոնք նման չեն մարդկության՝ նախկինում արված որևէ բանի: Հենց այս ուժն էլ մենք կօգտագործենք առաջ տանելու համար օբյեկտները մոտակա 1000 տարվա ընթացքում <…> մինչև հաջորդ հայտնագործությունը կատարվի»,- ավելացրել է նա:
Նախկինում նմանատիպ հայեցակարգ առաջ էր մղվում IVO-ի կողմից: Այն առաջարկում էր առանց վառելիքի հրթիռային շարժիչներ՝ EmDrive և Quantum Drive: Դրա զարգացումները դեռևս ոչ մի կերպ իրենց չեն դրսևորել։ Այս առումով NASA-ի վետերանն ավելի մեծ վստահություն է ներշնչում, բայց առանց իրական պայմաններում՝ տիեզերքում փորձարկելու, հավանաբար վաղաժամ է գնահատականներ տալ։
Միացե՛ք How2B-ի Տելեգրամյան ալիքին՝ ամենահետաքրքիր հոդվածներն ու նորությունները բաց չթողնելու համար:
