Հայաստանի Հանրապետության էկոնոմիկայի նախարարությունը և «Ներդրումների աջակցման կենտրոն» հիմնադրամը նոր նախաձեռնություն են սկսել՝ ուղղված «Forbes 100 Most Valuable Brands» վարկանիշային ցուցակում ընդգրկված ընկերություններին Հայաստան ներգրավելուն: Այս քայլի նպատակն է խթանել երկրի տնտեսական զարգացումը՝ ներգրավելով օտարերկրյա ներդրումներ և ստեղծելով առավել բարենպաստ ու մրցունակ գործարար միջավայր:
Նախաձեռնությունը կենտրոնանում է տնտեսության իրական հատվածում օտարերկրյա ներդրումների ներգրավման վրա: Այն նպատակ ունի ոչ միայն ներգրավել խոշոր միջազգային ընկերություններին, այլև խրախուսել տեղական խոշոր բիզնեսների համագործակցությունը նրանց հետ:
Խոշոր ընկերություններին, որոնք հետաքրքրված են համագործակցել «Forbes 100 Most Valuable Brands» ցուցակում ընդգրկված ընկերությունների հետ, առաջարկվում է լրացնել հատուկ հայտադիմում: Հայտում ընկերությունները կարող են ներկայացնել իրենց գործունեության ոլորտը և հետաքրքրության շրջանակը:
«Ներդրումների աջակցման կենտրոն» հիմնադրամը պատասխանատու կլինի առաջնային կապի հաստատման և հետագա սպասարկման համար Հայաստանում: Սա ենթադրում է, որ հիմնադրամը կհանդիսանա կապող օղակ տեղական և միջազգային ընկերությունների միջև՝ նպաստելով արդյունավետ համագործակցության ձևավորմանը:
Նախաձեռնության վերաբերյալ լրացուցիչ տեղեկություններ ստանալու համար շահագրգիռ կողմերը կարող են զանգահարել 011208105 հեռախոսահամարով:
Միացե՛ք How2B-ի Տելեգրամյան ալիքին՝ ամենահետաքրքիր հոդվածներն ու նորությունները բաց չթողնելու համար:
