ՀՀ կառավարությունն ընդունել է որոշում, որով նախատեսվում է աջակցություն տրամադրել տնտեսավարողներին՝ վարկերի տոկոսադրույքի սուբսիդավորման և տեղական արտադրանքի իրացման խթանման նպատակով։
Որոշման համաձայն՝ աջակցությունն իրականացվելու է երկու տարբեր ծրագրերի շրջանակում․
- Ծրագիր 1-ի շրջանակում տնտեսավարողներին կտրամադրվի օժանդակություն այն նպատակային վարկերի տոկոսադրույքի սուբսիդավորման միջոցով, որոնք ստացվում են ՀՀ տարածքում գործող ֆինանսական կազմակերպություններից և ուղղված են թիրախային ապրանքների վերամշակման համար անհրաժեշտ միջոցների ձեռքբերմանը։
- Ծրագիր 2-ն նախատեսում է ֆինանսական աջակցություն տրամադրել թիրախային ապրանքներ արտադրող և սեփական արտադրանքը ՀՀ տարածքում իրացնող տնտեսավարողներին՝ յուրաքանչյուր իրացված տոննայի համար 10,000 դրամի չափով։
Նախագծով ծրագրվում է 2025 թվականին ծրագրերի իրականացման նպատակով պետական բյուջեից հատկացնել ընդհանուր 150 միլիոն դրամ՝ վերաբաշխման միջոցով։ Մասնավորապես՝
- Ծրագիր 1-ի համար՝
- 9 ամսվա ընթացքում՝ 25 մլն դրամ,
- տարեկան՝ 50 մլն դրամ։
- Ծրագիր 2-ի համար՝
- կիսամյակային փուլում՝ 35 մլն դրամ,
- 9 ամսվա ընթացքում՝ 65 մլն դրամ,
- տարեկան՝ 100 մլն դրամ։
Քանի որ երկուսն էլ պիլոտային ծրագրեր են, կառավարության գնահատմամբ՝
- Ծրագիր 1-ի դեպքում, ելնելով 50 մլն դրամ սուբսիդավորման բյուջեից և վարկերի մայր գումարի մարումների հնարավոր փոփոխություններից, նախատեսվում է շուրջ 1 մլրդ 260 մլն դրամ վարկերի ընդհանուր ծավալ։
- Ծրագիր 2-ի դեպքում՝ նախատեսվում է մինչև 10,000 տոննա սեփական արտադրության թիրախային ապրանքի իրացում, որի հիման վրա կտրամադրվի օժանդակություն։
