Ճապոնական ավտոարդյունաբերության խոշոր ընկերություններ Honda-ն և Nissan-ը քննարկում են միավորման հնարավորությունը՝ ստեղծելու միասնական հոլդինգ՝ ավելի արդյունավետ մրցակցելու Tesla-ի և չինական BYD-ի նման ընկերությունների հետ:
Ըստ Nikkei Asia-ի, կողմերը արդեն քննարկել են հուշագիր, որը նախատեսում է բիզնեսի վարումը միասնական հոլդինգի միջոցով:
Նրանք նաև նախատեսում են ներգրավել Mitsubishi Motors-ին, որի 24%-ը պատկանում է Nissan-ին:
Այս միավորումը կարող է հանգեցնել տարեկան ավելի քան 8 միլիոն ավտոմեքենայի համատեղ վաճառքի, ինչը կդարձնի նրանց աշխարհի խոշորագույն ավտոարտադրողներից մեկը, թեև դեռ զիջելով Toyota-ին:
Ներկայումս ընկերությունները հայտարարում են, որ ուսումնասիրում են համագործակցության տարբեր հնարավորություններ՝ առանց հաստատելու կամ հերքելու միավորման մասին լուրերը:
Այս հայտարարությունների ֆոնին Nissan-ի բաժնետոմսերը աճել են 11%-ով, իսկ Honda-ի բաժնետոմսերը՝ 1%-ով:
Նշենք, որ նոյեմբերին Nissan-ը հայտարարել էր 9000 աշխատակցի կրճատման և արտադրական հզորությունների 20%-ով նվազեցման մասին՝ պատճառաբանելով ավտոմոբիլային շուկայում աճող մրցակցությունը:
Տարվա առաջին կեսի արդյունքներով Nissan-ի զուտ շահույթը նվազել է 94%-ով՝ հասնելով 127 միլիոն դոլարի:
