Փորձագետներն ահազանգում են, որ Google ընկերությունը վերահսկում է ամեն ինչ օգտատերերի Android սմարթֆոններում. վերլուծվում են ներբեռնված հավելվածները, լուսանկարները և նույնիսկ հաշվարկները հաշվիչում, հայտնում է Cybernews.com-ը:
Cybernews-ի ամերիկացի փորձագետները փորձարկել են Google Pixel 9 Pro XL սմարթֆոնը և պարզել, որ Google-ը ժամում մի քանի անգամ ուղարկում է սարքի տեղադրության տվյալները իր սերվերներին և նույնիսկ GPS-ն անջատելը չի օգնում դադարեցնել այդ հսկողությունը:
Եթե Android սմարթֆոնի սեփականատերը կարգավորումներում անջատում է GPS-ը, Google-ը դեռ կարող է որոշել աշխարհագրական դիրքը՝ օգտագործելով միացված Wi-Fi կետերի տվյալները: Բացի այդ, Google-ը տեղեկություններ է հավաքում ցանցի կարգավիճակի, օպերատորի, ներբեռնված հավելվածների ցուցակների, այդ թվում՝ Google Play-ից չտեղադրված ծրագրերի, սարքի վերագործարկման քանակի, ինչպես նաև հեռախոսի միացումից հետո անցած ժամանակի մասին:
Երբեմն Google-ի ծառայությունները կապվում են հավելվածների հետ, որոնք անձը երբեք չի գործարկել, օրինակ՝ Google Maps-ը, Gmail-ը կամ Chrome-ը: Մասնավորապես, սմարթֆոնը կարող է Google Photos-ից ուղարկել մարդու դեմքերի մասին տվյալներ, թեև օգտատերը կարող է երբեք չբացել հավելվածը կամ նկարներ վերբեռնել դրա մեջ։ Նույնիսկ սովորական Հաշվիչ հավելվածը ենթակա է հսկողության՝ Google-ը հավաքում է հաշվարկային տվյալները և ուղարկում դրանք իր սերվերներին:
Բացի այդ, բացահայտվել է, որ ընկերությունը կարող է հեռակա կարգով փոխել օպերացիոն համակարգի կոդը՝ առանց օգտատիրոջը զգուշացնելու, հեռացնել կամ տեղադրել հավելվածներ և տարբեր ծրագրեր, սակայն նման դեպքեր դեռ չեն գրանցվել։ Փորձագետները կարծում են, որ նման գործունեությունը պոտենցիալ «պատուհան» է հաքերների համար, ովքեր կարող են օգտագործել Android տարբերակը՝ սարքերում վնասակար կոդերը գաղտնի ներբեռնելու համար:
Cybernews-ի հետազոտողներն այս բացահայտումների մասին իրենց հարցադրումները փոխանցել են Google-ին՝ մեկնաբանության համար, սակայն ընկերությունը դեռևս չի արձագանքել:
Ավելի վաղ ցանցին հայտնի էր դարձել, որ Samsung-ի և LG-ի խելացի հեռուստացույցները ամեն վայրկյան սքրինշոթ են անում, թե ինչ եք դիտում:
