Երկու ամսից էլ քիչ ժամանակ է անցել Gemini առաջադեմ նեյրոնային ցանցի գործարկումից, բայց Google-ն արդեն ներկայացրել է դրա իրավահաջորդին։ Gemini 1.5 ավելի մեծ լեզվական մոդելը ներկայացվել է այսօր և անմիջապես հասանելի է մշակողների և ձեռնարկությունների օգտատերերի համար, իսկ սպառողների համար հասանելի կլինի շուտով: Google-ը շատ պարզ ակնարկում է, որ ցանկանում է օգտագործել Gemini-ն որպես բիզնես գործիք, անձնական օգնական և ոչ միայն:
Gemini 1.5-ն ունի բազմաթիվ բարելավումներ: Gemini 1.5 Pro-ն, որը կհզորացնի Google-ի շատ ծառայություններ, 87%-ով գերազանցում է Gemini 1.0 Pro-ին և թեստերի արդյունքում այն գտնվում է մոտավորապես նույն մակարդակում, ինչ բարձրակարգ Gemini 1.0 Ultra-ն:
Նոր մոդելի ստեղծման ժամանակ օգտագործվում է ավելի ու ավելի տարածված «Փորձագետների խառնուրդ» (Mixture of Experts — MoE) մոտեցումը, որը ենթադրում է, որ հարցում ուղարկելիս գործարկվում է ընդհանուր մոդելի միայն մի մասը, և ոչ ամբողջը: Այս մոտեցումը մոդելը դարձնում է ավելի արագ օգտագործողի համար և ավելի արդյունավետ Google-ի համար:
Սակայն Gemini 1.5-ի հետ կապված մի նոր բան կա, որով Google-ում բոլորը, սկսած գործադիր տնօրեն Սունդար Պիչայից, հատկապես ոգևորված են: Նեյրոնային ցանցի նոր տարբերակն ունի հսկայական համատեքստային պատուհան, ինչը նշանակում է, որ այն կարող է մշակել շատ ավելի մեծ հարցումներ և միանգամից դիտել շատ ավելի շատ տեղեկատվություն: Պատուհանի չափը 1 միլիոն թոքեն է, ինչն անհամեմատ մեծ է, քան OpenAI-ի GPT-4-ի 128,000-ը և ներկայիս Gemini Pro-ի 32,000-ը:
«Դա 10 կամ 11 ժամ տևողությամբ տեսանյութ է, կոդերի տասնյակ հազարավոր տողեր», – նշել է Պիչայը: Նա նաև ավելացրել է, որ Google-ի հետազոտողները փորձարկում են համատեքստային պատուհանը 10 միլիոն թոքենի համար. սա, օրինակ, «Գահերի խաղի» ամբողջ սերիան է մեկ հարցումով:
Միացե՛ք How2B-ի Տելեգրամյան ալիքին՝ ֆինանսաբանկային ամենահետաքրքիր նորությունները բաց չթողնելու համար:
