Կալիֆորնիայի դատարանը Google-ին պարտավորեցրել է վճարել 314 մլն դոլար Android օգտատերերի տվյալները ապօրինաբար հավաքելու համար, գրում է Bloomberg-ը՝ հղում անելով հայցվորների և ընկերության ներկայացուցիչների իրավաբանական ծառայություններին:
Այս գործի շրջանակներում Google-ին մեղադրում էին նրանում, որ ընկերությունը Android հեռախոսները ծրագրավորել է հաճախորդների տվյալները իր սերվերներ փոխանցելու համար այն ժամանակ, երբ սարքերը կապված չեն Wi-Fi-ի հետ:
Հայցվորները նշել են նաև, որ Google-ը հավաքած տվյալները օգտագործել է իր սեփական կորպորատիվ շահերի համար՝ ներառյալ թիրախավորված գովազդի պարամետրերի բարելավման և քարտեզագրման հնարավորությունների ընդլայնման նպատակով:
Google-ի ներկայացուցիչ Խոսե Կաստանեդան հայտարարել է, որ ընկերությունը կտրականապես չի համաձայնում վճիռի հետ և մտադիր է բողոքարկել որոշումը: Նրա խոսքերով՝ գործում նշված տեղեկատվությունը անհրաժեշտ է ընկերությանը միլիարդավոր Android սարքերի արդյունավետ աշխատանքի ապահովման համար:
Կաստանեդան նշել է նաև, որ Android հեռախոսների օգտատերերը համաձայնություն են տալիս տեղեկատվության Google-ին ուղարկելու վերաբերյալ՝ ստորագրելով բազմաթիվ օգտագործման պայմանների համաձայնագրեր և սարքերի կարգավորման պարամետրեր:
Google-ի դեմ հավաքական հայցը ներկայացվել է 2019 թվականին Կալիֆորնիայի բնակիչների անունից: Համահունչ դաշնային գործը, որը վերաբերում է ամբողջ երկրի Android օգտատերերին, դատարանում կսկսի քննվել 2026 թվականի սկզբին:
