Վրաստանի կառավարությունը օտարում է հողերը սեփականատերերից դեպի Հայաստան՝ Ռուսթավի-Սադախլո նոր ավտոմայրուղու կառուցման համար, հայտնում է Newsgeorgia-ն։
Համաձայն վրաստանի Էկոնոմիկայի նախարարի կողմից հրապարակված հրամանի՝ ծրագիրը ֆինանսավորվում է Եվրոպական ներդրումային բանկի կողմից՝ Արևելք-Արևմուտք միջազգային ճանապարհային ծրագրի վարկային համաձայնագրի շրջանակներում:
Ավտոմայրուղու շինարարությունը կարժենա 250 մլն եվրո։ Այն անցնելու է գործող ճանապարհին զուգահեռ, լինելու է չորս գոտի, իսկ երկարությունը՝ մոտ 30 կիլոմետր, ներառյալ՝ 11 կամուրջները և անցումները։
Ըստ նախարարի հրամանի՝ մի քանի հողատերեր հրաժարվել են վաճառել իրենց սեփականությունը կամ չեն համաձայնվել առաջարկվող գնին, և այժմ հողամասերի օտարումը տեղի է ունենալու հարկադիր կերպով։ Երկրի էկոնոմիկայի նախարարի համապատասխան հրամանում հղում է արվում Վրաստանի Սահմանադրության 19-րդ հոդվածին, ըստ որի՝ գույքի հարկադիր օտարումը թույլատրվում է հանրային հրատապ շահի դեպքում՝ լրիվ և արդարացի փոխհատուցման պայմանով։
Նախարարի հրամանը մեկ ամսվա ընթացքում կարող է բողոքարկվել Թբիլիսիի քաղաքային դատարանի վարչական խորհրդում։
Միացե՛ք How2B-ի Տելեգրամյան ալիքին՝ ամենահետաքրքիր հոդվածներն ու նորությունները բաց չթողնելու համար:
