Fitch Ratings միջազգային վարկանիշային գործակալությունը հաստատել է Հայաստանի երկարաժամկետ արտարժութային պարտքային վարկանիշը «BB-» մակարդակում՝ կայուն հեռանկարով։ 2025թ. հունվարի 24-ին հրապարակված զեկույցում գործակալությունը մանրամասն վերլուծել է Հայաստանի տնտեսության ներկա վիճակն ու զարգացման հեռանկարները:
Վարկանիշային գործակալության գնահատմամբ՝ Հայաստանի տնտեսության ուժեղ կողմերից են մեկ շնչի հաշվով եկամտի և կառավարման ցուցանիշների համապատասխանությունը նմանատիպ վարկանիշ ունեցող երկրների միջին ցուցանիշներին, ինչպես նաև կայուն մակրոտնտեսական քաղաքականության շրջանակը և աճի դրական հեռանկարները: Fitch-ը մատնանշում է նաև մի շարք մարտահրավերներ, որոնցից առանցքայիններն են բյուջեի դեֆիցիտի աճը և պետական պարտքի բարձր մակարդակը:
Ըստ կանխատեսումների՝ 2025 թվականին բյուջեի դեֆիցիտը կհասնի ՀՆԱ-ի 5.5%-ին՝ 2024 թվականի 4.7%-ի համեմատ: Պետական պարտքը նույնպես աճի միտում ունի և մինչև 2026 թվականի վերջը կարող է հասնել ՀՆԱ-ի 55%-ին: Գործակալությունը նշում է նաև ֆինանսական համակարգի դոլարացման բարձր մակարդակը և աշխարհաքաղաքական ռիսկերը որպես լրացուցիչ մարտահրավերներ:
Տնտեսական աճի առումով Fitch-ը կանխատեսում է, որ 2024 թվականին այն կկազմի 6%՝ նախորդ տարվա 8.3%-ի համեմատ: 2025 թվականին աճը կդանդաղի մինչև 4.8%, իսկ 2026 թվականին՝ մինչև 4.5%: Այս դանդաղեցումը պայմանավորված է մի շարք գործոններով, այդ թվում՝ Ամուլսարի հանքի շահագործման մեկնարկի հետաձգմամբ:
Կարևոր է նշել, որ 2025 թվականի հունվարից Կենտրոնական բանկը նվազեցրել է գնաճի թիրախը՝ սահմանելով այն 3%՝ ±1 տոկոսային կետ տատանման միջակայքով: Fitch-ը դրական է գնահատում Հայաստանի՝ ցածր գնաճի պահպանման ցուցանիշները՝ համեմատած նմանատիպ վարկանիշ ունեցող երկրների հետ:
Զեկույցում անդրադարձ է կատարվել նաև Հայաստան-Ադրբեջան հարաբերություններին: Գործակալության գնահատմամբ, խաղաղության պայմանագրի կնքումը կարող է դրական ազդեցություն ունենալ Հայաստանի երկարաժամկետ աճի ներուժի վրա՝ առևտրային ուղիների ապաշրջափակման միջոցով:
