Կայունացման և զարգացման եվրասիական հիմնադրամի (ԿԶԵՀ) «Տարածաշրջանային տնտեսական ակնարկ» զեկույցի համաձայն՝ 2025 թվականի առաջին եռամսյակում Հայաստանի տնտեսությունը վերականգնվել է նախորդ տարվա համեմատ։ ՀՆԱ-ի եռամսյակային աճը կազմել է 2.9%, իսկ տարեկան կտրվածքով՝ 5.2%։ Արտահանման կրճատման հետևանքով մաքուր արտահանման մասնաբաժինը տնտեսական աճում եղել է բացասական՝ -9.1 տոկոսային կետ։
Տնտեսական ակտիվությունը խթանվել է ներքին պահանջարկի միջոցով։ Դրամական փոխանցումների (տարեկան աճը՝ 20.4%), աշխատավարձերի իրական աճի (3.2%) և վարկավորման ընդլայնման (27.8%) արդյունքում սպառման ծավալներն աճել են, հատկապես՝ ծառայությունների ոլորտում։ Տեղեկատվական տեխնոլոգիաները և ֆինանսաբանկային համակարգը զգալի ներդրում են ունեցել ՀՆԱ-ի աճում։
Գնաճը շարունակել է վերականգնվել՝ մարտին կազմելով 3.3%, իսկ մայիսին՝ արդեն 4.3%՝ գերազանցելով ԿԲ թիրախի վերին շեմը։ Գները աճել են հիմնականում ներմուծվող պարենային ապրանքների և ծառայությունների հաշվին։ Դրամը որոշակիորեն արժեզրկվել է, իսկ արտաքին առևտուրը նվազել՝ արտահանման կրճատման պատճառով։
Ֆիսկալ քաղաքականությունը 2025 թվականի առաջին եռամսյակում եղել է զսպող՝ գրանցվել է պետական բյուջեի պրոֆիցիտ՝ ՀՆԱ-ի 1%-ի չափով։
