Ապրիլի 12-ին տեղի կունենա «Դիջիկոդ» կիրառական ծրագրավորման պատանեկան 10-րդ մրցույթի հանրապետական եզրափակիչ փուլը, որը կազմակերպվում է Առաջատար Տեխնոլոգիաների Ձեռնարկությունների Միության (ԱՏՁՄ) կողմից՝ որպես «ԱՐՄԱԹ» ճարտարագիտական աշխատանոցների ծրագրի բաղկացուցիչ մրցութային մաս։
«ԴԻՋԻԿՈԴ 2025»-ին մասնակցության հայտ է ներկայացրել ավելի քան 1600 աշակերտ ՀՀ մայրաքաղաքից, բոլոր մարզերից, Ջավախքից, Քուվեյթից և ԱՄՆ-ից: Արդեն 10-րդ տարին անցկացվող այս մրցույթի նպատակն է խրախուսել և զարգացնել աշակերտների ալգորիթմական մտածողությունը: DigiCode-ը դարձել է նաև արդյունավետ հարթակ, որտեղ Հայաստանի բոլոր մարզերի դպրոցականները հանդիպում են միմյանց, կիսվում գիտելիքներով և նորարարական գաղափարներով։ «Աշակերտներին խաղ սպառողից վերածել խաղ ստեղծողի» այսպիսին է մրցույթի ուղերձը, որն արդեն տարիներ շարունակ բացահայտում է տաղանդավոր հայ պատանիների և հնարավորություն տալիս նրանց զարգացնելու իրենց ստեղծագործական ունակությունները։
Մրցույթի գործընկերներն են ՀՀ ԿԳՄՍ նախարարությունը և Հայաստանում ամերիկյան համալսարանը։ Մրցույթի հովանավորն է IDBank-ի և IDram-ի «Մի դրամի ուժը» նախագիծը:
