Չինական Ուհանը և Չունցինը քաղաքներում ինտերնետ-հսկա Baidu-ն կգործարկի լիովին ինքնավար կոմերցիոն ռոբոտ-տաքսիներ, տեղեկանում ենք Reuters-ից: Առաջիկայում այն հնարավոր կլինի պատվիրել Apollo Go հատուկ ծառայության միջոցով:
Տաքսիները մարդկանց կտեղափոխեն ամեն օր ժամը 09:00-ից 17:00-ն Ուհանում, 09:30-ից 16:30-ը՝ Չունցինում: Ճամփորդությունները տեղի կունենան միայն հատուկ, կառավարության կողմից հաստատված տարածքներում: Տարածքները, որտեղ կգործի Baidu-ն, խիտ բնակեցված չեն եւ ունեն բավականաչափ նոր լայն ճանապարհներ, որոնք ամենահեշտն են ինքնավար մեքենաների համար:
Ինքնավար մեքենաներն արդեն մի քանի ամիս է՝ անվճար երթեւեկում են Պեկինի ճանապարհներով: Ըստ քաղաքային իշխանությունների հետ կնքված համաձայնագրի՝ մեքենայում պարտադիր է նաեւ վարորդի ներկայությունը, որը կղեկավարի մեքենան չնախատեսված խնդրի դեպքում:
Baidu-ն մտադիր է ընդլայնել Apollo Go-ն. մինչեւ տարեվերջ ավտոպարկը կհամալրվի 300 ռոբոտ-տաքսիով: Ավելին, նրանք ցանկանում են մինչեւ 2025 թվականը ծառայությունը մատուցել 65, իսկ մինչեւ 2030 թվականը՝ 100 քաղաքում:
Այժմ Baidu-ն բանակցություններ է վարում Չինաստանի ևս երեք քաղաքներում՝ Շենժենում, Պեկինում և Շանհայում ամբողջովին ինքնակառավարվող տաքսիներ գործարկելու շուրջ:
Տեխնոլոգիական և բիզնես ոլորտի այլ նորությունների ծանոթացե՛ք՝ միանալով մեր Տելեգրամյան ալիքին։
