Ռուսաստանի Խանտի Մանսիյսկ քաղաքում կայացած ֆիզիկայի միջազգային գիտական օլիմպիադայում Հայաստանի թիմը նշանակալի հաջողության է հասել՝ նվաճելով ընդհանուր առմամբ 8 մեդալ: Հայ աշակերտները վերադարձել են 2 արծաթե և 6 բրոնզե պարգևներով:
Մրցույթին մասնակցել են 19 երկրների 108 ներկայացուցիչներ: Մրցանակակիրները սովորում են երկու ուսումնական հաստատություններում՝ Ա. Շահինյանի անվան ֆիզմաթ դպրոցում և Հայաստանի ազգային պոլիտեխնիկական համալսարանի ավագ դպրոցում:
Արծաթե մեդալներ են նվաճել Արսեն Աղայանը (ֆիզմաթ դպրոց) և Արտյոմ Գասպարյանը (ՀԱՊՀ ավագ դպրոց): Բրոնզե մեդալների են արժանացել ՀԱՊՀ-ի ավագ դպրոցի երեք սաներ՝ Արմեն Գազազյանը, Նարեկ Մովսիսյանը և Արսեն Ասատրյանը, ինչպես նաև ֆիզմաթ դպրոցի երեք աշակերտներ՝ Նարեկ Գալստյանը, Սմբատ Պողոսյանը և Գոռ Հասրաթյանը:
Այս տպավորիչ արդյունքը վկայում է Հայաստանի պատանի ֆիզիկոսների բարձր պատրաստվածության և երկրի գիտակրթական համակարգի արդյունավետության մասին:
Միացե՛ք How2B-ի Տելեգրամյան ալիքին՝ ամենահետաքրքիր հոդվածներն ու նորությունները բաց չթողնելու համար:
