Մարտի 3-ին Իսպանիայի Բարսելոնա քաղաքում մեկնարկել է «Համաշխարհային բջջային կոնգրես 2025»-ը (Mobile World Congress 2025), որը բջջային տեխնոլոգիաների և կապի ոլորտի ամենախոշոր միջազգային միջոցառումներից է։ ՀՀ բարձր տեխնոլոգիական արդյունաբերության նախարարությունն արդեն երրորդ անգամ մասնակցում է կոնգրեսին՝ հայկական միասնական տաղավարով։
Հայկական տաղավար է այցելել նաև ՀՀ բարձր տեխնոլոգիական արդյունաբերության նախարարի տեղակալ Ռուբեն Սիմոնյանի գլխավորած պատվիրակությունը՝ ծանոթանալով ցուցադրված արտադրատեսակներին և տեխնոլոգիաներին։ Ցուցահանդեսին ներգրավված են ոլորտի 17 կազմակերպություններ, որոնցից 10-ը հանդես են գալիս որպես ցուցադրող, 7-ը՝ որպես այցելու։ Միջոցառմանը մասնակցում է նաև «Ներդրումների աջակցման կենտրոն» (Enterprise Armenia) հիմնադրամը։
Կոնգրեսի շրջանակում ներկայացվում են կապի նորագույն տեխնոլոգիաներ, արհեստական բանականության լուծումներ և այլ ոլորտային նորամուծություններ։ Միջոցառումը ներառում է նաև համաժողովներ, կլոր սեղան-քննարկումներ և պանելային քննարկումներ, որտեղ պետական պաշտոնյաները, տեխնոլոգիական ընկերությունների ներկայացուցիչները և ներդրողներն ունեն հնարավորություն ձևավորելու նոր գործարար կապեր։
