Հայաստանի Հանրապետության և Ամերիկայի Միացյալ Նահանգների կառավարությունները ստորագրել են փոխըմբռնման հուշագիր՝ նպատակ ունենալով զարգացնել համագործակցությունը արհեստական բանականության (ԱԲ) և կիսահաղորդիչների ոլորտում։
Հուշագրի համաձայն` կողմերը նախատեսում են խորացնել գործընկերությունը կիսահաղորդիչների մատակարարման անվտանգ շղթաների ստեղծման և Հայաստանի տեխնոլոգիական էկոհամակարգի զարգացման ուղղությամբ։ Մասնավորապես ծրագրվում է․
- խթանել ներդրումները Հայաստանի կիսահաղորդիչների էկոհամակարգում,
- աջակցել մասնավոր հատվածի ներգրավմանը համատեղ նախագծերում,
- ամրապնդել արտահանման վերահսկողության մեխանիզմները,
- խթանել գիտահետազոտական գործընկերությունները, այդ թվում՝ հնարավոր երկազգ հիմնադրամի միջոցով,
- զարգացնել աշխատուժը և բարձր տեխնոլոգիական ենթակառուցվածքները։
Փաստաթուղթը նպատակ ունի նաև բարձրացնել Հայաստանի կարգավիճակը ԱՄՆ արտահանման վերահսկողության համակարգում՝ նպաստելով տեխնոլոգիական առևտրայնացմանն ու տնտեսական աճին։
Հուշագիրը նախապես նախատեսված է մեկ տարվա ժամկետով, որի ավարտից հետո հնարավոր կլինի երկարաձգել ևս երեք անգամ։
