Ըստ Վիճակագրական կոմիտեի նկատելի է երկարատև գործազրկության կրճատում․ նախորդ տարվա 52.5 տոկոսից իջել է մինչև 42.8 տոկոս։
2025 թվականի հունիսին միջին անվանական աշխատավարձը կազմել է 297 624 դրամ, ինչը շուրջ 8 տոկոսով գերազանցում է 2024 թվականի նույն ամսվա ցուցանիշը։ Մասնավորապես՝ 50 և ավելի աշխատող ունեցող կազմակերպություններում միջին աշխատավարձը կազմել է 370 636 դրամ, իսկ ոչ պետական խոշոր ընկերություններում՝ 431 612 դրամ։
Տնտեսության ոլորտային բաշխման մեջ բարձր են վարձատրվում տեղեկատվական տեխնոլոգիաների և կապի ոլորտի աշխատողները՝ ամսական շուրջ 833 967 դրամ։ Ֆինանսական և ապահովագրական ոլորտի մասնագետները 902 135 դրամ միջին աշխատավարձ են ստանում, հանքարդյունաբերության ոլորտում՝ 879 377 դրամ։ Համեմատաբար ցածր են աշխատավարձերը սպասարկման, կրթության, ինչպես նաև հանրային սննդի ոլորտներում, որտեղ միջինը չի գերազանցում 200 000 դրամը։
Կա նաև գենդերային զգալի անհամաչափություն։ Տղամարդկանց միջին աշխատավարձը 2025 թվականի հունիսին կազմել է շուրջ 372 202 դրամ, մինչդեռ կանանց՝ 226 198 դրամ։ Տարբերությունը հատկապես մեծ է ՏՏ, ֆինանսական և արդյունաբերական ոլորտներում։
Հունիսին պաշտոնապես գրանցված թափուր աշխատատեղերի թիվը կազմել է 3 192, ինչը նախորդ տարվա համեմատ գրանցել է 98.3 տոկոս աճ։ Սակայն մեկ թափուր աշխատատեղի դիմաց հաշվվում է մոտ 19 աշխատանք փնտրող, ինչը դեռևս համարվում է բարձր։
Աշխատավարձերի մարզային բաշխումն առանձնանում է լուրջ տարբերություններով։ Ամենաբարձր աշխատավարձը գրանցվել է Երևանում՝ 347 002 դրամ և Սյունիքի մարզում՝ 380 074 դրամ։ Ամենացածր ցուցանիշները դիտվել են Գեղարքունիքում՝ 146 355 դրամ և Տավուշում՝ 156 806 դրամ։
