2024 թվականի Global Entrepreneurship Monitor զեկույցի համաձայն՝ Հայաստանի ձեռներեցության միջավայրը միջինից ցածր է գնահատվում․ 56 երկրների շարքում՝ 20-րդ տեղ։
Հայաստանի NECI (National Entrepreneurial Context Index) ցուցանիշը 2024 թվականին կազմել է 4.9 միավոր, ինչը միջինից ցածր գնահատական է։ Ամենաբարձր գնահատված ոլորտներն են՝ կառավարության քաղաքականությունը հարկային և բյուրոկրատական կարգավորումների հարցում, ֆիզիկական ենթակառուցվածքները, սոցիալական և մշակութային ոլորտը։ Թույլ զարգացած ոլորտներն են՝ կառավարության ձեռներեցության աջակցման ծրագրերը, ձեռներեցության կրթությունը դպրոցական և հետդպրոցական մակարդակներում, ինչպես նաև հետազոտությունների արդյունքների կիրառումը բիզնես դաշտում։
Հայաստանում տնային տնտեսությունների 33%-ը հայտնել է եկամուտների նվազման մասին։ 48.8%-ը ճանաչում է մեկին, ով վերջին երկու տարվա ընթացքում սկսել է բիզնես։ 51.4%-ը համարում է, որ իրենց համայնքում կան բիզնես սկսելու լավ հնարավորություններ։ 59.6%-ը կարծում է, որ ունի բիզնես սկսելու համար անհրաժեշտ հմտություններ։ 38.4%-ը, տեսնելով բիզնես սկսելու լավ հնարավորություն, վախենում է ձախողումից և ձեռնպահ է մնում։
Հայաստանում յուրաքանչյուր հինգերորդ մեծահասակ սկսում կամ արդեն ղեկավարում է նոր բիզնես։ Տղամարդիկ գրեթե երկու անգամ ավելի հաճախ են ձեռնարկատեր դառնում, քան կանայք, ինչը մասամբ պայմանավորված է կանանց՝ ձեռներեցության ռեսուրսներին ավելի ցածր հասանելիությամբ։
Հայաստանում նոր ձեռնարկությունների 40%-ն ունի հաճախորդներ երկրի սահմաններից դուրս։ 50%-ը նախատեսում է ավելի ակտիվորեն կիրառել թվային տեխնոլոգիաներ ապրանքների և ծառայությունների վաճառքի համար։
