Bloomberg-ի ինսայդեր և խմբագիր Մարկ Գուրմանը ասել է, որ Apple-ն ավարտել է iOS 16-ի և watchOS 9-ի մշակումը։ Երկու օպերացիոն համակարգերը պետք է թողարկվեն iPhone-ի նոր շարքի հետ մեկտեղ։
Իր տեղեկագրում Գուրմանը հաստատել է այն տեղեկությունը, որ Apple-ը կներկայացնի iPhone 14-ը՝ սեպտեմբերի սկզբին։ Սմարթֆոնից բացի, ընկերությունը կցուցադրի Apple Watch Series 8-ը: Ինսայդերը դա բացատրում է նրանով, որ անցյալ շաբաթ ընկերության ինժեներներն ավարտել են iOS 16-ի և watchOS 9-ի մշակման գործընթացը: Գուրմանը նաև նշել է, որ iPadOS 16-ը և macOS Ventura-ն նույնպես կներկայացվեն, որոնք կթողարկվեն հոկտեմբերին։ Հետաձգումը պայմանավորված էր iPad-ի Stage Manager ֆունկցիայի հետ կապված խնդիրների հետ:
Նոր iOS 16-ը ներառում է կողպէկրանը հարմարեցնելու և դրան վիջեթներ ավելացնելու հնարավորություն, իսկ iMessage-ը հնարավորություն կունենա խմբագրելու և ջնջելու ուղարկված հաղորդագրությունները:
Ավելի վաղ ինսայդերներից մեկը հայտնել էր, որ աշնանային շնորհանդեսը կբաժանվի երկու մասի. առաջինը տեղի կունենա 2022 թվականի սեպտեմբերի 7-ին, որի ժամանակ ընկերությունը կներկայացնի iPhone 14-ը և Apple Watch 8-ը, երկրորդ մասը նախատեսված է հոկտեմբերին։ Միջոցառման ընթացքում Apple-ը կարող է ներկայացնել բյուջետային iPad՝ USB-C-ով, iPad Pro՝ M2-ով և նոր պրոցեսորների վրա հիմնված համակարգիչներ։
Տեխնոլոգիական և բիզնես ոլորտի այլ նորությունների ծանոթացե՛ք՝ միանալով մեր Տելեգրամյան ալիքին։
