Apple ընկերությունը հայտարարել է, որ կբացի iPhone-ի NFC տեխնոլոգիան երրորդ կողմի անհպում վճարման ծառայությունների համար՝ որպես Apple Pay-ի այլընտրանք:
Հաղորդագրության մեջ նշվում է, որ iOS 18.1-ում մշակողները հնարավորություն կունենան կիրառել անհպում վճարումների գործառույթը՝ NFC-ի միջոցով: Այս մոդուլը նախկինում աշխատում էր միայն Apple Pay վճարային համակարգի հետ, սակայն Եվրոպական հանձնաժողովի ճնշման հետևանքով ընկերությունը ստիպված եղավ վերագործարկել նախկինում փակված էկոհամակարգը:
Տեխնոլոգիայի նկարագրության մեջ նշվում է, որ երրորդ կողմի ընկերությունները մուտք կստանան NFC և SE (Secure Element) API-ներին: Ընկերությունը հայտնել է, որ մշակողները կկարողանան կարգավորել բանկային քարտերի և հաշիվների աշխատանքը՝ ապրանքների վճարման, մեքենայի վիրտուալ բանալիների, անցագրերի, տրանսպորտային տոմսերի, ուսանողական քարտերի և այլ այլընտրանքային գործիքների ու ծառայությունների համար:
Սակայն ոչ բոլոր մատակարարները կկարողանան կարգավորել իրենց ծառայությունների աշխատանքը: Ծառայություն մատուցողները պետք է ընկերության հետ կնքեն առևտրային պայմանագիր և վճարեն համապատասխան գումարներ, որոնց չափը չի նշվում: Բացի Եվրամիության (ԵՄ) ընկերություններից, ընկերության էկոհամակարգից կարող են օգտվել նաև Ավստրալիայում, Բրազիլիայում, Կանադայում, Ճապոնիայում, Նոր Զելանդիայում, Մեծ Բրիտանիայում և ԱՄՆ-ում: Ապագայում ընկերությունը խոստացել է ավելացնել նոր տարածաշրջաններ:
Հունիսի վերջին Եվրոպական հանձնաժողովը վերջնականապես հաստատել էր ընկերության ծրագրերը՝ բացելու իր էկոհամակարգը երրորդ կողմի վճարային համակարգերի համար: Երրորդ կողմի վճարային ծառայությունները կաշխատեն Apple Pay-ից և Wallet թվային դրամապանակից առանձին:
Միացե՛ք How2B-ի Տելեգրամյան ալիքին՝ ամենահետաքրքիր հոդվածներն ու նորությունները բաց չթողնելու համար:
