Google-ը ներկայացրել է նոր ուժեղացված պաշտպանության ռեժիմ (Advanced Protection), որը ներառված կլինի Android 16 օպերացիոն համակարգի ապագա տարբերակում։ Այս ռեժիմը նախատեսված է պաշտպանելու օգտատերերին զանգերի գաղտնալսումից, չպաշտպանված ցանցերի միջոցով տվյալների որսումից և խարդախ հաղորդագրություններից։
Նորույթը ներկայացվել է այն պայմաններում, երբ հրապարակվել են տեղեկություններ այն մասին, որ իսրայելական NSO Group ընկերությունը շարունակում է մշակել և վաճառել բարդ կիբերհարձակման գործիքներ՝ շարժական սարքեր կոտրելու համար։ Այս հարձակումների թիրախում են լինում կոնտակտները, հաղորդագրությունների պատմությունը, գտնվելու վայրը և այլ անձնական տվյալներ։ Անգամ Android և iOS համակարգերի թարմացումներից հետո նման գործիքները շարունակում են գործել։
Ուժեղացված պաշտպանության ռեժիմը, որը կարելի է միացնել սարքի կարգավորումներում, նախատեսված է այդ վտանգներից օգտատերերին պաշտպանելու համար։ Այն մի շարք գործառույթներ է անջատում և սահմանափակում՝ կոտրման որոշ տեխնիկաների դեմ արդյունավետ լինելու նպատակով։
Google-ը խորհուրդ է տալիս այս ռեժիմից օգտվել հատկապես լրագրողներին, պետական պաշտոնյաներին և այն անձանց, ովքեր կարող են հայտնվել թիրախում։
Այս պաշտպանական մոտեցումը համեմատելի է Apple-ի Lockdown Mode-ի հետ, որը ներդրվել էր iOS-ում 2022 թվականին։ Երկու դեպքում էլ նպատակը նույնն է՝ նվազեցնել հնարավոր հարձակման մակերեսը՝ անջատելով այն գործառույթները, որոնք առավել խոցելի են։ Android-ի դեպքում այս ռեժիմը նույնպես կարող է աշխատել առանց օգտատիրոջ համար տեսանելի փոփոխությունների։
