17 օրում «Բարբի»-ն դարձավ կին ռեժիսորի կողմից նկարահանված առաջին ֆիլմը, որը մեկ միլիարդ դոլար գումար է վաստակել: Մարքեթինգի վրա ծախսված գումարը կազմել է 150 մլն դոլար: Ամբողջ ֆիլմի արտադրության գումարը ավելի քիչ է, քան մարքեթինգը՝ 145 մլն դոլար:
Վառ գույները, ամենուր երևացող Բարբին, յուրաքանչյուր աղջկա դիպչող պատմությունն ու «Բարբիատենդը» ֆիլմի պրեմիերայից դեռ շատ ժամանակ առաջ դարձել էին բոլորիս կյանքի մասը:
«Բարբի»-ի հետ նույն օրը թողարկվեց նաև Քրիստոֆեր Նոլանի «Օպենհեյմերը»: Ու երբ մեմերը Բարբիի վարդագույնի ու Օպենհեյմերի սևի մասին համեմատականներ էին տանում դեռ շատ ժամանակ առաջ, ոչ ոք չէր էլ կարող պատկերացնել, որ մեմերն իրականություն կդառնան: Կինոթատրոնում վարդագույն հագածները «Բարբի»-ին էին այցելության գնալու, սևերը՝ Օպենհեյմերին: Որպես կանոն:
Էսթետիկ ինտելեկտ՝ վարդագույն իրականությունից զատ
«Բարբի»-ի մարքեթինգային թիմը համագործակցել է ավելի քան 100 ընկերության հետ՝ ստեղծելու պրոդուկտներ, որոնք ուղիղ առնչություն կունենան «Բարբի»-ի հետ. ZARA, NYX, Xbox, Balmain, Hot Wheels, նույնիսկ Բարբիի «երազանքների տունը», որ կարելի է Airbnb-ով վարձել:
Անկախ Բարբիի՝ որպես կերպարի հակասական լինելուց՝ բոլորը ճանաչում են նրան: Արդեն նաև որպես ֆիլմի կերպար:
Ո՞րն է առաջին ասոցիացիան, երբ լսում եք «Բարբի» բառը: Երևի թե վարդագույնը, ապա գեղեցիկը՝ իր բոլոր արտահայտումներով, հետո էլ, միգուցե, Մարգո Ռոբին, ով գիտե:
Բարբին, դեռ անցած դարից սկսած, դարձել է բրենդ, որը ստեղծում է հստակ էսթետիկ ընկալում ու պատկերացում, որը, առաջին հերթին, ձևավորում է հենց բրենդը: Իսկ այս դեպքում ֆիլմ ստեղծողներն էլ ուղղակի ամրապնդել են այդ էսթետիկ ընկալումը:
Մարդիկ ծնվում են ավելի մեծ էսթետիկ ունակություններով, քան օգտագործում են։ Իհարկե, որոշ մարդիկ ունեն այդ ունակություններն ի ծնե, բայց ճաշակի զարգացումը և թրենդներին հետևելը այդ ունակությունները կարողանում են զարգացնել, հետո էլ թույլ են տալիս օգտագործել՝ հօգուտ սեփական բրենդի զարգացման՝ լինի դա անձնական բրենդ, թե որևէ կազմակերպություն:
Ինտելեկտի բարձր մակարդակով բիզնես առաջնորդները ոչ միայն սեփական էսթետիկ ճաշակն ու նախընտրություններին են միտված, այլ նաև իրենց հաճախորդների ճաշակին։ Վերջիվերջո հետազոտությունները ցույց են տալիս, որ գնում կատարելու որոշումների գրեթե 85 %-ը հիմնված են այն բանի վրա, թե ինչ տպավորություն է գործում պրոդուկտը կամ ծառայությունը սպառողի վրա․ միայն 15%-ն են հիմնված գործառույթների և նախանշանների ռացիոնալ գնահատականի վրա։ Չնայած դրան՝ առաջնորդների մեծամասնությունը ոչ համաչափ են կենտրոնանում վերջինի վրա։
Երբ «Բարբի»-ի թիմը, օրինակ, համագործակցում է Zara-ի հետ, դա ստացվում է «վարդագույն տենդի»՝ երկուստեք օգտակար գործակցություն. չէ՞ որ Zara-ի հաճախորդները, հետևելով թրենդներին, կգան գնելու այդ իրերը: Zara-ն էլ, իր հերթին, հետևելով թրենդներին ու հաճախորդների էսթետիկ վարքագծին, թողարկել է այդ իրերը:
Էսթետիկ ինտելեկտ. ի՞նչ, որտե՞ղ, ե՞րբ
Մինչ Դուք արդեն հոգնեցիք «Բարբի» բառից, եկեք հասկանանք, թե ինչ է էսթետիկ ինտելեկտը:
Եթե կարճ, ապա էսթետիկ ինտելեկտը ճաշակի առկայությունն է:
Եթե մի քիչ երկար՝ պրոդուկտները տարբերելու, դետալները նկատելու, պրոդուկտն իրապես հասկանալու գործընթացը: Եվ, այո՛, «էսթետիկ ինտելեկտը» ամենևին գեղեցիկի մասին չէ: Այն ավելի խորն է, որովհետև ընդգրկում է պրոդուկտի մասին ողջ պատկերացումը: «Բարբի»-ն վարդագույն է ու շատ գեղեցիկ, բայց ֆիլմից հետո թողած հետհամը ավելի դառն է, որովհետև ուղիղ առնչվում ես իրականությանը:
Այդպես էլ պրոդուկտների դեպքում: Երբ Coffee House-ից սուրճ ես գնում ու այնտեղ քո անունն է, կամ նույն «Բարբի»-ին ընդառաջ թիմը վարդագույն ֆրապուչինո է թողարկում, նրանք օգտագործում են էսթետիկ ինտելեկտը:
Ինչպե՞ս առաջխաղացնել բրենդը Ինստագրամի սթորիների օգնությամբ
«Էսթետիկ ինտելեկտ»-ի հասկացությունն առաջին անգամ կիրառել է Փոլին Բրաունը: Նա 25 տարի շարունակ աշխատել է LVMH-ում՝ որպես հյուսիսամերիկյան բաժնի ղեկավար: Եվ եթե հաշվի առնենք, որ մարքեթինգում ու էսթետիզմում ընդհանրապես նորաձևության բրենդներն են դարձել թրենդներն ու վիզուալ փորձը թելադրողը, ապա ամեն ինչ շատ օրինաչափ է ստացվում:
Սա բավականին նոր հասկացություն է, բայց եթե հաշվի առնենք, թե ինչպես է վիզուալը զարգանում և ինչպես են բոլորը սկսում բրենդերն ընկալել առաջինը վիզուալ տեսանկյունից, այն չափազանց կարևոր է դառնում:
Արդյո՞ք արհեստական բանականությունը սպանելու է էսթետիկ ինտելեկտը
Արհեստական բանականությունն արդեն կիրառելի է շատ ոլորտներում: Իհարկե, բրենդների վիզուալ բաղադրիչն ու հաճախորդների վիզուալ փորձը ևս անմասն չեն մնում արհեստական բանականության օգտագործումից:
Ինչպե՞ս կարող է արհեստական բանականությունը բարելավել էսթետիկ փորձը
Շատերը կարծում են, որ արհեստական բանականությունը նոր ստեղծագործական հնարավորություններ կստեղծի, սակայն ուրիշներն էլ, իհարկե, հակառակվում են: Կան մասնագետներ, որոնք համոզված են, որ արհեստական բանականությունը կարող է լիովին փոխարինել վիզուալ բաղադրիչներ ստեղծողներին:
Անկախ ոլորտից՝ արհեստական բանականությունը առաջարկում է գործիքներ, որոնք կհեշտացնեն Ձեր աշխատանքը վիզուալի ու էսթետիկ բաղադրիչի հետ: Երկրորդ ու շատ կարևոր հնարավորություններից մեկը անձնականացումն է: Այսինքն՝ արհեստական բանականությունով աշխատող գործիքները կարող են վերլուծել հաճախորդների/օգտատերերի անհատական վարքագիծն ու նախընտրությունները: Դա էլ հնարավորություն կտա ադապտացնել ստեղծվող կոնտենտը՝ ստեղծելով գրավիչ ու որ ավելի կարևոր է՝ տպավորիչ կոնտենտ: Արհեստական բանականության ինտեգրումը վիրտուալ և լրացուցիչ իրականության մեջ, վերլուծելու ու վերականգնելու ունակությունները ևս թույլ են տալիս արհեստական բանականության՝ վիզուալ բաղադրիչի մեջ կիրառումը է՛լ ավելի արդյունավետ դարձնել:
Ինչպե՞ս հեղափոխել Ձեր մարքեթինգը AI-ի միջոցով
Հեռու չգնալով «Բարբի»-ից՝ մարքեթոլոգները ստեղծել էին AI Barbie Selfie Generator, որը թույլ էր տալիս գեներացնել անսահմանափակ քանակությամբ մեմեր: Դրանք էլ, իհարկե, տարածվում էին սոցցանցերով՝ ապահովելով անվճար գովազդ ֆիլմի համար:
Իսկ որո՞նք են արհեստական բանականության կիրառմամբ էսթետիկ փորձի հնարավոր մտավախությունները
Էմոցիոնալ ռեզոնանսը, խորությունն ու իսկականությունը, որ հատուկ են մարդուն ու իր ստեղծածին, դեռևս ոչ մի կերպ չեն կարող հատկանշական դառնալ արհեստական բանականության համար: Բացի այդ էլ՝ դեռևս բավականին ճանաչելի են արհեստական բանականության միջոցով ստեղծված նկարները: Եվ վերջապես կա վտանգ, որ եթե մարդիկ կսկսեն չափից շատ հույս դնել արհեստական բանականությամբ աշխատող գործիքների վրա՝ կորցնելով սեփական կրեատիվությունը զարգացնելու ու նույնիսկ բազմակողմանի մտածելու ունակությունը:
Թրենդվոթչինգ. ի՞նչ է այն
Քանի որ վերևում արդեն խոսեցինք «Բարբի»-ի անհավանական թվացող մարքեթինգից և դրա կիրառումից գրեթե բոլոր ոլորտներում ու բրենդներում, անհրաժեշտ է դառնում անդրադառնալ նաև բավականին նոր ևս մեկ հասկացության՝ «թրենդվոթչինգին»:
Ցանկացած ոլորտում թրենդներին պարբերաբար հետևելը կոչվում է թրենդվոթչինգ՝ թրենդադիտում 😀 Այսօր, երբ իրավիճակային մոտեցումը դարձել է անհրաժեշտություն, իսկ երկարաժամկետ պլանավորումը երբեմն մնում է միայն թղթի վրա, հնարավոր և անհրաժեշտ է դառնում հետևել ընթացիկ միտումներին ու այն բանին, թե ինչպես են զարգանում տեխնոլոգիաները: Դա էլ իր հերթին կիրառել մասնագիտական աշխատանքում. լինի դա մարքեթինգ, ռազմավարական պլանավորում, թե աշխատանքի հեշտացում: Ի վերջո, ոլորտային միտումների կամ որ նույնն է՝ թրենդների ուսումնասիրությունը առաջընթացի ու ընկերության «ապառնիում» զարգացման հիմքը կարող են դառնալ:
Ինչպե՞ս «լեզու գտնել» Ցուկերբերգի հետ
Հետաքրքիր է, որ թրենդվոթչինգը կարելի է ուսումնասիրել երկու մակարդակով: Առաջինը հենց կազմակերպության համար ուսումնասիրությունն է, մակրոմակարդակով: Իսկ երկրորդը աշխատակիցների ուսումնասիրությունները, միկրոմակարդակով: Ըստ էության, եթե յուրաքանչյուր աշխատակից իր ոլորտի համար միկրոուսումնասիրություն կատարի, ամենաառաջինը սեփական աշխատանքը բարելավելու, նոր տեխնոլոգիաներ ու, միգուցե, տեխնիկաներ գտնելու համար, ապա այդ ուսումնասիրությունների գումարային արդյունքն էլ կծառայի որպես կազմակերպության ռազմավարական պլանավորման հիմք:
Թրենդվոթչինգը բիզնեսի համար
Եվ այսպես, ինչի՞ համար է թրենդվոթչինգը բիզնեսին.
- Դառնալու հաճախորդամետ ընկերություն
Եթե հետևեք վերջին թրենդներին Ձեր մասնագիտական ոլորտում, ապա մեծ է հավանականությունը, որ ամենահետաքրքիր ու արժեքավոր նորությունները կկիրառեք Ձեր պրոդուկտի զարգացման համար: Իսկ դա էլ իր հերթին կբարձրացնի հաճախորդների՝ Ձեր պրոդուկտը ձեռք բերելու հնարավորությունը: Չէ՞ որ փոխվում են նաև նրանք: Ձեզնից էլ սպասում՝ համապատասխանելու այդ փոփոխություններին:
- Լինելու առաջատար
Եթե առաջինը ներդնեք նոր ու թրենդային ոլորտային լուծումներ, օգտատերերը Ձեզ կսկսեն ընդունել որպես կարծիքի, ոլորտի առաջատար, դա էլ կհեշտացնի «պոտենցիալից ներկա» հաճախորդ դառնալու ուղին:
- Կանխատեսելու ապագան
Որքան էլ ապագային կանխատեսումը անիրական թվա, բայց մեկ քայլ առաջ մտածելը գործարարների լավագույն հատկանիշներից մեկն է: YCombinator-ի համահիմնադիր Փոլ Գրեհեմն այդ առիթով մի խոսք ունի՝ «Ապրի՛ր ապագայում, ապա ստեղծի՛ր այն, ինչ չկա հիմա»: Դա ամենևին չի ենթադրում միայն ապագայի մասին մտածելը, այլ պարզապես խոսում է այն մասին, որ ուսումնասիրելով թրենդները, կկարողանաք մեկ քայլով անցնել մնացածից և, միգուցե, հենց այդ քայլը ճակատագրական լինի Ձեր բիզնեսի թռիչքային զարգացման համար:
- Տեսնելու աճի նոր հնարավորություններ
Նոր պրոդուկտների, նոր տեխնոլոգիաների, նոր մարքեթինգային քայլերի ներդրումը տալիս է կազմակերպության աճի նոր հնարավորություններ:
Ինչի՞ համար է թրենդվոթչինգը մասնագետին.
Ի դեպ, այս դեպքում թրենդվոթչինգը ոչ միայն նեղ մասնագիտական թրենդները ուսումնասիրելու մասին է, այլ նաև ընդհանուր զարգացվածության մասին: Վերցնենք ամենահեշտ օրինակը. երբ ChatGPT-ն թողարկվեց, շատերը սկսեցին ուսումնասիրել լեզվական մոդելը և հնարավորության դեպքում կիրառել սեփական մասնագիտության մեջ. ծրագրավորողը կոդ էր գրում, հաշվապահը՝ Excel-ի հետ աշխատանքը հեշտացնող բանաձև փնտրում, լրագրողը՝ հոդվածների բովանդակություն կազմում և այդպես շարունակ: Նրանք, ովքեր կարողացան խելամիտ օգտագործել լեզվական մոդելը, մեկ քայլով առաջ անցան իրենց այն գործընկերներից, ովքեր այդ ռեսուրսը չփորձեցին կիրառել:
Բացահայտելով ChatGPT-ն. նրա հնարավորություններն ու տարբեր ոլորտներում կիրառումը
Ինչպե՞ս իրականացնել թրենդվոթչինգ
Վերջում էլ անդրադառնանք թրենդվոթչինգի իրագործման փուլերին: Իհարկե, ամենահեշտ տարբերակը ուղղակի Ձեր ոլորտի հետաքրքիր դեմքերին ու բրենդներին հետևելն է: Բայց եթե դա պետք է արվի բրենդի համար, առանձնացնենք մի քանի փուլ.
- Նպատակադրում. ինչի՞ համար ենք կիրառելու թրենդվոթչինգից ստացած տվյալները:
- Աղբյուրների բացահայտում. որտեղի՞ց ենք վերցնելու տվյալները, որ անհրաժեշտ են թրենդվոթչինգի համար: Մասնագիտական կայքեր, կազմակերպության ընդհանուր չաթեր, որտեղ յուրաքանչյուրը ժամանակ առ ժամանակ կկիսվի հետաքրքիր տեղեկատվությամբ, հոլովակով կամ որ կարճ՝ թրենդով, ոլորտի կարևոր դեմքերի անձնական էջեր սոցիալական մեդիայում և այլն: Նույնիսկ մեր կայքը՝ How2B-ն, կարող է Ձեզ համար դառնալ թրենդվոթչինգի աղբյուր, չէ՞ որ ոլորտի ամենահետաքրքիր ու թարմ նորությունները մեզ մոտ են: Եթե չեք հասցնում ամեն օր հետևել, դա էլ խնդիր չէ: Շաբաթական կամ էլ ամսական ամփոփումները այդ հարցում օգտակար կարող են լինել:
- Տվյալների վերլուծություն. հավաքել, ապա համակարգել ու վիզուալիզացնել տվյալները՝ հստակ վերլուծություն կատարելու համար: Սա էլ արդեն թչենդվոթչինգի իրագործման երրորդ փուլն է:
- Արդյունքի ստացում. վերլուծությունից հետո էլ կստանաք անհրաժեշտ տվյալները, որից հետո արդեն կհասկանաք, թե ինչ թրենդներ են առկա շուկայում, ինչ խնդիրներ լուծմանն են ուղղված դրանք, և վերջապես ինչ քայլեր կարող եք ձեռնարկել թրենդները Ձեր աշխատանքում կիրառելու համար:
Փոխվում են թրենդները, ընկալումներն ու բրենդները. մեզ էլ մնում է միայն հետևել այդ փոփոխություններին ու կամա, թե ակամա դառնալ դրանց մի մասը:
Տեխնոլոգիական և բիզնես ոլորտի այլ նորությունների ու թրենդների ծանոթացե՛ք՝ միանալով մեր Տելեգրամյան ալիքին։
