Հանրապետության նախագահ Վահագն Խաչատուրյանն ընդունել է «Սյունիք» ներդրումային ֆոնդի կառավարիչ Ադամ Կաբլանյանին և շնորհել Երախտագիտության մեդալ։
Հայ-ամերիկյան ձեռներեց, տեխնոլոգիական նորարար Կաբլայանը մեդալին արժանացել է բարձր տեխնոլոգիական արդյունաբերության զարգացման գործում ներդրած ավանդի և բարեգործական անխոնջ գործունեության համար։
Նախագահ Խաչատուրյանը բարձր է գնահատել գործարարի տարիների վաստակը և Հայաստանում իրականացրած բազմաթիվ նախաձեռնությունները, որոնք կարևոր ներդրում են երկրի զարգացման և հզորացման գործում։ Հանրապետության նախագահը մաղթել է Ադամ Ալեքսան Կաբլանյանին քաջառողջություն և նոր հաջողություններ հայրենանվեր գործունեության մեջ։
Ադամ Ա. Կաբլանյանը հայ-ամերիկացի ձեռնարկատեր է, որի ճանապարհորդությունը սկսվել է Հալեպից ու հասել մինչև Սիլիկոնյան հովիտ։ 1996 թվականին Կաբլանյանը համահիմնադրել է Virage Logic-ը։ Նրա ղեկավարության ներքո ընկերությունը 2000 թվականին հրապարակվել է NASDAQ-ում, ունեցել մինչև 700-ից ավելի աշխատակից և դարձել ոլորտի համաշխարհային առաջատար: Հայաստանի համար բարդ տնտեսական շրջանում Կաբլանյանը ընկերության մասնաճյուղ է բացել այստեղ։ Նրա ինժեներների թիմը նախագծել է առաջին սերնդի Apple iPod-ում օգտագործվող բաղադրիչները՝ Հայաստանը տեղադրելով տեխնոլոգիական նորարարությունների քարտեզի վրա:
Ադամ Կաբլանյանը 2017 թվականին Հայաստանում հիմնադրել է Alexandrea Winery-ն՝ համատեղելով խաղողագործության ժառանգությունն ու նորարարությունը։ Digitec 2025-ին որպես խոսնակ, Ադամ Կաբլանյանը, պատմում էր նորարարության ու մշակույթի հատման մասին։
