Սեպտեմբերի 28-29-ն Երևանում անց էր կացվում գիտության և տեխնոլոգիաների կոնվերգենցիայի համաժողովը (Science & Technology Convergence Conference – STCC), որն իր հարկի տակ է հավաքել 10 երկրի լավագույն գիտնականներին և մասնագետներին:
Science & Technology Convergence Conference – STCC համաժողովին ելույթ ունեցան ավելի քանի 80 խոսնակ, տարբեր ձևաչափերով՝ պանելային քննարկումներ, ելույթներ:
«Մասնագետներն իրենց ոլորտների հետազոտությունները, հաջողությունները ներկայացնում են բեմից, ունենք նաև պոստերներ, այսինքն գիտահեզտազոտական կենտրոնները իրենց հետազոտությունների պոստերները փակցրել են և մարդիկ մոտենում են ու ծանոթանում աշխատանքին: Հիմնական նպատակն այն է, որ ոլորտի լավագույն մասնագետներին բերեն այստեղ, ծանոթացնեն միմյանց հետ, որից կստեղծվի մեծագույն արժեք: Միջոցառումը հրաշալի նեթվորք է ստեղծում մարդկանց միջև, ինչից հետո ստեղծվում է մի ընկերություն կամ պրոեկտ, որը հետագայում մեծ գումար է բերում թե՛ երկրի բյուջեին, թե՛ էկոհամակարգին»,- How2b.am-ի զրույցում ասաց SmartGate վենչուրային հիմնադրամի ներկայացուցիչ, համաժողովի կազմակերպիչ Սամվել Խաչիկյանը:
Այս տարի համաժողովն ունի 3 ուղղություն՝
• Արհեստական բանականություն, համակարգչային տեսություն և ինքնավարության հետազոտություն,
• Հաշվարկային կենսատեխնոլոգիա և առողջապահություն,
• Ֆիզիկա, ճարտարագիտություն և տիեզերք:
Մինչև 2020 թվականը համաժողովը երկու անգամ Հայաստան էր հրավիրել ոլորտի լավագույն մասնագետներին: Oբյեկտիվ պատճառներով պայմանավորված դադարից վերսկսված միջոցառումն այս տարի ավելի մասշտաբային է: Ակնկալվում է համաժողովին տեսնել ավելի քան 1000 հյուր:
«Անցած մոնիտորինգի արդյունքները ցույց են տվել, որ հայկական էկոհամակարգում ամենամեծ զարգացումը տեղի է ունեցել վերջին 3-4 տարվա ընթացքում: Չենք կարող առանձնացել ու ասել, թե որ միջոցառումն է ավելի մեծ ազդեցություն ունեցել, բայց եթե դիտարկում ենք բոլոր կոնֆերանսներն ու միջոցառումները, ապա դրանք բոլորն իրենց ազդեցությունն են ունեցել»,- ասաց Սամվել Խաչիկյանը:
Հյուրերը գրեթե բոլորը գիտական ոլորտից են, իսկ այս տարի առանձնահատուկ ուշադրություն են դարձրել biotech ոլորտին: Ցանկություն կա ուսումնասիրություն անել ու բացահայտել Հայաստանում դրա զարգացման հնարավորությունը:
«Կարծում եմ գիտության դերը բոլոր ոլորտներում մեծ աճ է գրանցում: Օրինակ SmartGate-ն ավելի շատ կենտրոնացած deeptech ստարտափերի վրա, որոնք զբաղվում են AI-ով և եզակի արժեք ունեն: Մենք վերցնում ենք գիտական լաբորատորիայից ինչ-որ հետազոտություն, բերում ենք բիզնես աշխարհ, ստանում ենք բիզնես: Դա ստարտափի լավագույն տեսակն է, որը կարող է լինել»,- ասաց Սամվել Խաչիկյանը:
Ըստ կազմակերպիչների, նմանատիպ կոնֆերանսները նպաստում են, որ նախ օտարազգի գիտնականները գան Հայաստան, կապեր հաստատեն, որն օգուտ կբերի թե՛ Հայաստանին, թե՛ էկոհամակարգին: Իսկ ինչ վերաբերում է տեխնոլոգիայից բիզնեսին անցմանը, որն անվանում են technology transfer, ապա այս կոնֆերանսը նպաստում է հենց դրա միտմանը:
«Մենք հարուստ ենք մեր սփյուռքով և միշտ փորձել ենք կապը պահել սփյուռքի հետ: Բայց այս պահին փորձում ենք ընդլայնել մեր նեթվորքը արտասահմանի հետ: SmartGate-ն ունի նաև hub, որը գործում է նաև Գլենդելում: Մենք կամուրջ ենք հանդիսանում Հայաստանի և Ամերիկայի միջև: Տենդենց է դա թե ոչ, բայց համենայն դեպս դա կարևորագույն կապ է, որը մենք այնտեղ ունենք: Անգնահատելի ռեսուրս, որը մենք փորձում ենք բերել Հայաստան ու օգտագործել Հայաստանի համար»,- ասաց կազմակերպիչը:
Անդրադառնալով խնդիրներին, Խաչիկյանը նշեց, որ ոլորտի գլխավոր խնդիրներից մեկը տաղանդների բացակայությունն է:
«Մարդիկ որոնք ունեն պոտենցիալ, բայց այս պահին չեն կարողանում լիովին օգտագործել այn: Այս տեսակ կոնֆերանսներն օգնում են, որ գտնենք այդ մարդկանց և օգնենք, որ իրենց պոտենցիալը գործածեն: Ես լիազորություն չունեմ ասելու, թե արդյոք գումարային խնդիրներ ունենք ներդրումների հետ կապված, բայց դա էլ Հայաստանում գնալով հարստանում է, ինվեստրները գնալով շատանում են, ինչը կարևոր է դառնում մի շարք ստարտափների մեջ ներդրումներ կատարելու համար»:
Տեխնոլոգիական և բիզնես ոլորտի նորությունները՝ մեր Ֆեյսբուքյան էջում։
