Նավթի համաշխարհային գները կտրուկ աճել են, երբ ԱՄՆ նախագահ Դոնալդ Թրամփը հայտարարել է իրանական բեռնատար նավի առգրավման մասին: Brent տեսակի նավթի մեկ բարելի արժեքն աճել է ավելի քան 6%-ով՝ հասնելով մոտ 96 դոլարի: Իրանը հայտարարել էր Հորմուզի նեղուցը վերաբացելու մասին, սակայն շաբաթ օրը Թեհրանը կրկին փակել է նեղուցը՝ զգուշացնելով, որ ցանկացած մոտեցող նավ կդառնա թիրախ:
Իրավիճակի սրմանը զուգահեռ՝ ԱՄՆ-ը պատրաստվում է բանակցությունների, որոնք պետք է կայանային այսօր Պակիստանում: Սպիտակ տան տվյալներով՝ ամերիկյան պատվիրակությունը կգլխավորի փոխնախագահ Ջեյ Դի Վենսը: Այնուամենայնիվ, իրանական կողմը հայտարարել է, որ առայժմ բանակցություններին մասնակցելու ծրագրեր չունի: Իրանը պնդում է, որ նեղուցը փակ կմնա այնքան ժամանակ, քանի դեռ ԱՄՆ-ը չի դադարեցրել երկրի ծովային շրջափակումը:
Էներգակիրների շուկայում տիրող այս անկայունությունը լուրջ խնդիրներ է առաջացրել հատկապես Ասիայում, որն իր էներգետիկ կարիքների 90%-ն ապահովում է հենց Հորմուզի նեղուցով անցնող բեռնափոխադրումների հաշվին: Տարածաշրջանի մի շարք երկրներում արդեն իսկ սահմանվել են էներգախնայողության խիստ միջոցներ. կրճատվել է աշխատանքային շաբաթը, իսկ բնակչությանը հորդորել են սահմանափակել օդորակիչների օգտագործումը: Նույնիսկ Չինաստանը, որն ունի վառելիքի զգալի պաշարներ, ստիպված է եղել վերանայել գնային քաղաքականությունը՝ բնակչության համար գների 20% աճի ֆոնին:
