Արհեստական բանականության (AI) ստեղծողները մտահոգված են իրենց իսկ ստեղծած գործիքների չարաշահման խնդրով, և OpenAI-ի գործադիր տնօրեն Սեմ Ալթմանը բացառություն չէ: ԱՄՆ Դաշնային պահուստային համակարգի փոխնախագահ Միշել Բոումանի հետ զրույցի ժամանակ նա ասել է, որ շուտով ցանցը կհեղեղվի ոչ միայն ցանկացած մարդու ձայնի, այլև արտաքինի բարձրորակ կրկնօրինակներով, որոնք կարող են օգտագործվել անօրինական նպատակներով:
Ալթմանը նախազգուշացրել է, որ առաջիկայում AI միջոցով ինքնության կեղծման դեպքերի աճը կարող է հանգեցնել զանգվածային ֆինանսական խարդախությունների։ Նրա խոսքով՝ բանկերը և ֆինանսական հաստատությունները պետք է վերանայեն իրենց անվտանգության համակարգերը, քանի դեռ ուշ չէ։
Ալթմանի կարծիքով՝ ներկայումս մի շարք բանկեր դեռեւս օգտագործում են ձայնային նույնականացում՝ հաճախորդների անձը հաստատելու համար, ինչը չափազանց խոցելի է դարձել նորագույն AI տեխնոլոգիաների զարգացմամբ։ Նրա խոսքով՝ AI-ն արդեն ունակ է կեղծել մարդու ձայնը, արտաքին տեսքը և վարքը այնպիսի հստակությամբ, որ մարդը դժվարությամբ է տարբերակում կեղծն ու իրականը։
Նա նշել է, որ մոտ ապագայում հնարավոր են զանգվածային խարդախություններ, երբ հանցագործները կկարողանան զանգահարել բանկ՝ կեղծ ձայնով ներկայացնելով ինչ-որ մեկին և առանց կասկած առաջացնելու փոխանցել նրա հաշվից մեծ գումարներ։ Այս իրավիճակը նա բնորոշել է որպես «մոտալուտ խարդախությունների ճգնաժամ»՝ ընդգծելով, որ անհրաժեշտ է շտապ վերանայել նույնականացման մեթոդները։
Ալթմանի կարծիքով՝ ներկայումս անվտանգ է միայն գաղտնաբառերի օգտագործումը, քանի որ մնացած բոլոր մեթոդները՝ ձայնը, դեմքի ճանաչումը կամ տեսազանգերը, հնարավոր է կեղծել AI-ի միջոցով։ Նա կոչ է արել ֆինանսական ինստիտուտներին վերացնել միայն ձայնային նույնականացման վրա հիմնված համակարգերը և ներդնել ավելի վստահելի ու ժամանակակից պաշտպանական միջոցներ։
Նրա այս հայտարարությունը հնչել է ԱՄՆ Դաշնային պահուստային համակարգի կազմակերպած քննարկման ժամանակ, որտեղ խոսքը գնացել է AI տեխնոլոգիաների ազդեցության մասին ֆինանսական անվտանգությանը։ Նա ընդգծել է, որ անհրաժեշտ է միջազգային համագործակցություն և տեխնոլոգիական կարգավորում՝ խարդախությունների նման ալիքը կանխելու համար։
