OpenAI-ի ղեկավար Սեմ Ալթմանն իր բլոգում հայտնել է արհեստական ինտելեկտի զարգացման վերաբերյալ իր կանխատեսումը։ Նրա կարծիքով՝ շատ շուտով կհայտնվի արհեստական սուպերբանականությունը։ Եվ հնարավոր է՝ ստիպված չլինենք դրան երկար սպասել։
Ալթմանի հոդվածը կոչվում է «Ինտելեկտի դարաշրջան» (անգլ՝. The Intelligence Age)։ Դրանում նա կիսվում է իր մտքերով, թե ինչպես կզարգանան AI տեխնոլոգիաները մոտ ապագայում և հեռավոր ապագայում։ Ձեռնարկատիրոջ խոսքով՝ շատ շուտով մարդկությունը կարող է սուպերբանականություն ստեղծել։ Դա կտևի «մի քանի հազար օր» և հավանաբար կավարտվի մինչև այս տասնամյակի վերջը: «Սա կարող է դառնալ մինչ այժմ պատմության ամենակարևոր իրադարձությունը», – գրել է Ալթմանը:
Գերբանականությունը կամ սուպերինտելեկտը վերաբերում է արհեստական ընդհանուր ինտելեկտին (AGI): Նման տեխնոլոգիան իր կարողություններով կարելի է համեմատել մարդու ուղեղի հետ։ Ալթմանը կարծում է, որ նման նեյրոնային ցանցերը մարդկանց կօգնեն «շատ ավելիին հասնել, քան մենք երբևէ կարող էինք առանց արհեստական ինտելեկտի»: «Առաջիկա մի քանի տասնամյակների ընթացքում մենք կկարողանանք անել այնպիսի բաներ, որոնք կախարդական կթվան մեր տատիկներին ու պապիկներին», – ասել է OpenAI-ի ղեկավարը:
AI-ի առավելությունների թվում Ալթմանը նշում է նեյրոնային ցանցերը որպես երեխաների, փորձագետների և անձնական օգնականների վիրտուալ դաստիարակներ օգտագործելու հնարավորությունը: Խելացի համակարգերը «մեր անունից որոշակի խնդիրներ կկատարեն, օրինակ՝ ձեր անունից բժշկական օգնությունը համակարգելը»: Իսկ ապագայում արհեստական ինտելեկտը կօգնի մարդկանց ստեղծել սուպերբանականության հաջորդ սերունդը և առաջընթացի հասնել գիտության ոլորտում, ինչպես նաև փրկել Երկրի կլիման:
Միաժամանակ, Ալթմանը ուշադրություն է հրավիրում նաև նոր տեխնոլոգիաների կիրառման հնարավոր ռիսկերի վրա։ Նա կարծում է, որ հաշվողական ծախսերը պետք է կրճատվեն, որպեսզի AI-ը հասանելի լինի «որքան հնարավոր է շատ մարդկանց»: Եթե դրան չհասնեն, ապա գերինտելեկտը կարող է միայն գործիք դառնալ հարուստ մարդկանց համար։ Իսկ դա կբերի տեխնոլոգիայի շուրջ պայքարի։
