Telegram-ը երկրորդ տեղն է զբաղեցրել ԱՄՆ-ում App Store-ի սոցցանցերի հավելվածների աղյուսակում, այն բանից հետո, երբ նրա հիմնադիր Պավել Դուրովը կալանավորվել է Ֆրանսիայում՝ անօրինական գործունեության մեջ ներգրավված լինելու մեղադրանքով։
Հավելվածը ներկայումս ներբեռնումների զգալի աճ է ապրում: Մեսսենջերի iOS-ով գլոբալ ներբեռնումները աճել են 4%-ով, հաղորդում է TechCrunch-ը:
Appfigures հավելվածների վերլուծական ընկերության տվյալների համաձայն՝ Telegram-ն անմիջապես չի զբաղեցրել երկրորդ հորիզոնականը ԱՄՆ-ում App Store սոցիալական ցանցերի աղյուսակում: Դա տեղի է ունեցել երկուշաբթի առավոտյան ժամը 3-ից անմիջապես հետո, ինչը ցույց է տալիս, որ հավելվածի ժողովրդականության աճը նոր է սկսվում:
Ֆրանսիայում, որտեղ կալանավորվել էր Դուրովը, հավելվածը App Store-ում «Սոցիալական ցանցեր» կատեգորիայի առաջին տեղն է զբաղեցրել և բոլոր հավելվածների մեջ զբաղեցրել երրորդ տեղը։
Հիշեցնենք, որ շաբաթ օրը Պավել Դուրովը կալանավորվել է այն մեղադրանքով, որ թույլ է տվել սոցիալական հավելվածում ապօրինի գործունեություն ծավալել՝ հատկապես թմրամիջոցների ապօրինի շրջանառության, փողերի լվացման և երեխաների շրջանում բռնության մասին նյութերի տարածման ոլորտներում:
Ֆրանսիայի նախագահ Էմանուել Մակրոնը մեկնաբանել է իրավիճակը՝ ասելով, որ ձերբակալությունը կատարվել է ընթացող դատական հետաքննության շրջանակներում, դատավորները կորոշեն գործը և, որ սա ոչ մի կերպ քաղաքական որոշում չէ։
Նշենք նաև, որ Դուրովին ձերբակալելուց հետո ֆրանսիական մի շարք պետական կառույցների կայքերը ենթարկվել են հաքերային հարձակումների։ Այս մասին հայտնում է ֆրանսիական Le Parisien-ը։
Հարձակումներն հիմնականում իրականացվել են ռուսամետ խմբերի կողմից, ինչպիսիք են UserSec-ը, RipperSec-ը, Holy League-ը և Cyber Army Now-ն, որոնք ստանձնել են դրանց իրականացման պատասխանատվությունը:
Միացե՛ք How2B-ի Տելեգրամյան ալիքին՝ ամենահետաքրքիր հոդվածներն ու նորությունները բաց չթողնելու համար:
