Վերջին ամիսներին Կարմիր ծովի հարավում գտնվող Բաբ էլ-Մանդեբ նեղուցով անցնող առնվազն 15 մալուխներից չորսը, որոնք Եվրոպան կապում են Ասիայի հետ և որոնք տեղափոխում են համաշխարհային ինտերնետ տրաֆիկի մինչև 17%-ը, վնասվել են: Վարկածներից մեկի համաձայն՝ միջադեպի մեղավորը Եմենի հութի զինյալներն են։
Վնասվածների թվում են EIG, AAE-1, Seacom և TGN-EA մալուխները, հայտնում է իսրայելական Globes հրատարակությունը։ Seacom-ը հաստատել է իր մալուխի խզումը Քենիայի և Եգիպտոսի միջև: Ինչ վերաբերում է մնացած մալուխներին, ապա EIG-ը (European India Gateway) Հարավային Եվրոպան կապում է Եգիպտոսի, Սաուդյան Արաբիայի, Ջիբութիի, ԱՄԷ-ի և Հնդկաստանի հետ: TGN-EA մալուխը պատկանում է հնդկական Tata Communications-ին: Իսկ AAE-1-ը Արևելյան Ասիան Եգիպտոսի միջոցով միացնում է Եվրոպային:
Դեկտեմբերին Հութի զինյալների հետ կապված Telegram ալիքներից մեկը հրապարակեց Կարմիր ծովի հատակով անցնող մալուխների քարտեզը: Ձայնագրությունն ուղեկցվել է հաղորդագրությունով, որ Եմենը գտնվում է ռազմավարական մի կետում, որտեղ ինտերնետի գծերն են միացնում ոչ միայն երկրները, այլ ամբողջ մայրցամաքները: ՄԱԿ-ի կողմից ճանաչված Եմենի կառավարության հետ կապ ունեցող հեռահաղորդակցության ընկերությունները նախազգուշացրել են հնարավոր դիվերսիաների մասին: Խափանված կապի գծերի պատճառած վնասը եղել է «զգալի, բայց ոչ կրիտիկական», քանի որ դեռևս մնացել են մի քանի անձեռնմխելի մալուխներ:
Վնասված մալուխների վերանորոգումը այնքան հեշտ չէ: Աշխատանքը կտևի առնվազն ութ շաբաթ, և աշխատողները վտանգի են ենթարկվում գրոհայինների կողմից: Վնասված գծերից ամենակարեւորը AAE-1-ն է՝ նրա երկարությունը մոտ 24850 կմ է։
Հաղորդվում է, որ հութիները չունեն սուզվող սարքեր, որոնք անհրաժեշտ են մալուխները վնասելու համար, սակայն որոշ տեղերում կապի գծերը գտնվում են 100 մ խորության վրա, ինչը հնարավորություն է տալիս հարձակվել մալուխների վրա առանց ժամանակակից տեխնիկական միջոցների:
Բիզնես և տեխնոլոգիական ոլորտի նորությունները բաց չթողնելու համար միացե՛ք How2B-ի Տելեգրամյան ալիքին։
