Հայ գիտական և մշակութային ընկերակցության (ASOF) նախաձեռնությամբ Հայաստանում առաջիկայում Ռոբոտաշինության միջազգային կենտրոն է բացվելու։
Կենտրոնը ոչ միայն կպատրաստի մասնագետներ, կզարգացնի հետազոտություններն այս ոլորտում, այլ նաև միջազգային փորձ կբերի Հայաստան, այդ թվում՝ Սփյուռքի գիտնականների հետ համագործակցության միջոցով։ Այն գործելու է որպես մասնավոր ֆինանսավորմամբ հիմնադրամ՝ դիմելով դրամաշնորհային ծրագրերի։
Տամպերեի համալսարանի պրոֆեսոր, տեխնիկական գիտությունների դոկտոր Կարեն Եղիազարյանը նախաձեռնողներից մեկն է։ Նրա կարծիքով՝ ժամանակն է, որ Հայաստանը առաջատար դառնա ռոբոտաշինության ոլորտում։ Կենտրոնը գիտահետազոտությամբ է զբաղվելու։ Այն մասնագետներ կպատրաստի Հայաստանի արդյունաբերության համար։
«Կենտրոնի ստեղծումը մի քանի ուղղություններ ունի, բայց դրանց հետևում նպատակ է դրված երկիրը վերադարձնել խորհրդային ժամանակների մակարդակին, երբ հայերը մեծ դերակատարում ունեին խորհրդային ռոբոտաշինության մեջ, որի օրինակը լուսնագնացն էր, որը 1970թ. ուղարկվել էր Լուսին»,-նշել է Կարեն Եղիազարյանը։
Նախատեսվում է նաև հայրենիք վերադարձնել Եվրոպայում և ԱՄՆ-ում կրթություն ստացած հայ երիտասարդներին, որպեսզի նրանք կարողանան իրենց կրթությունն ու աշխատանքը այստեղ շարունակել, ռոբոտաշինության ոլորտում նոր հետազոտողներ ու ձեռներեցներ պատրաստել։
Տեխնոլոգիական և բիզնես ոլորտի այլ նորությունների ծանոթացե՛ք՝ միանալով մեր Տելեգրամյան ալիքին։