Digital Silk Road-ը հայկական ստարտափ է, որի նպատակն է կապել Արևմուտքը Չինաստանի հետ՝ Հայաստանում ստեղծված տեխնոլոգիայի միջոցով, ինչպես որ հին Մետաքսի ճանապարհը կապեց տարբեր մշակույթների՝ Հայաստանը դիտարկելով որպես կարևոր խաչմերուկ: Digital Silk Road-ը ներդրվում է չինական ծրագրերում և չինացի տուրիստներին առաջարկում հետաքրքիր ճամփորդություն՝ Հայաստանով մեկ և ոչ միայն:
How2b.am-ը զրուցել է Digital Silk Road-ի համահիմնադիր Նարե Արղուշյանի հետ:
Մտածեցինք, որ հետաքրքիր կլինի կապել մեր ընկերության գործունեությունը մետաքսե ճանապարհի կոնցեպտի հետ:
Digital Silk Road-ում ստեղծված տեխնոլոգիան ներառում է WeChat և Alibaba & Alipay հարթակներում ներդրվող մինի հավելվածները, որոնց միջոցով արևմտյան ընկերությունները հնարավորություն են ստանում չինացի հաճախորդներին առաջարկել իրենց պրոդուկտները: Վերոնշյալ հարթակները նաև տալիս են հավելյալ առավելություններ գործընթացը կազմակերպելու համար՝ էլեկտրոնային առևտրի, թվային կտրոնների, քարտային վաուչերների, WeChat խանութի և այլնի միջոցով:
«Գաղափարն առաջացել է, քանի որ Հայաստանը մետաքսե ճանապարհին եղել է կարևոր անցակետ, միջնադարյան քաղաքները հատկապես, օրինակ` Անին, որն այդ ժամանակ ծառայել է, որպես քաղաքակրթությունների և մշակույթների խաչմերուկ: Մենք մտածեցինք, որ հետաքրքիր կլինի կապենք մեր ընկերության գործունեությունը մետաքսե ճանապարհի կոնցեպտի հետ: Թվային եղանակով վերականգնենք այն դերը, որ Հայաստանը կատարել է մետաքսե ճանապարհի վրա: Շատ կարևոր է Գյումրիի և Անիի նմանությունը, որպես պատմական քույր քաղաքներ: Մեր ընկերությունը հիմնադրվել է Գյումրիում և մեծ նախապատմություն կա մետաքսե ճանապարհի հետ կապված, քան Հայաստանի որևէ այլ քաղաքի»,- պատմեց Նարե Արղուշյանը:
Ստարտափի համահիմնադիրներ՝ Նարե Արղուշյանն ու Աշոտ Ալեքսանյանը տևական ժամանակ ապրել ու աշխատել են Չինաստանում և զրույցներից մեկի ժամանակ, որը վերաբերում էր այդ երկրին, գաղափար ծնվեց ստեղծել ստարտափը, քանի որ ըստ Նարեի, այն շուկան ու հնարավորությունները, որն ունի հիմա Չինաստանը, բավարար կերպով ներկայացված չեն Հայաստանում:
«Չկան կազմակերպություններ կամ ընկերություններ, որոնք զբաղում են դրանով:Քանի որ մենք ավելի շատ ՏՏ ընկերություն ենք, մտածեցինք այդ կապը ստեղծելու և զարգացնելու ուղղությամբ»,- ասաց Նարե Արշուղյանը:
Չինական որոնողական համակարգերով Հայաստան գրելիս հիմնական ինֆորմացիայի բնույթն աշխարհաքաղաքական էր կամ վերջին պատերազմի մասին:
Նարե Արղուշյանի խոսքով, չինական սոցիալական մեդիայում և որոնողական համակարգերում Հայաստանի մասին ինֆորմացիան շատ ցրված է: Ստարտափերների հետազոտությունները ցույց են տվել, որ չինական որոնողական համակարգերով Հայաստան գրելիս հիմնական ինֆորմացիայի բնույթն աշխարհաքաղաքական էր կամ վերջին պատերազմի մասին:
«Որոշեցինք ընտրել մի տեխնոլոգիա, որը շատ հայտնի է Չինաստանում և դրա միջոցով ներկայացնել Հայաստանը, որպես տուրիստական նպատակակետ: Հասկացանք, որ ամենահարմար տարբերակն այս փուլում WeChat-ն է, քանի որ, այն Չինաստանում ունի ավելի քան մեկ միլիարդ ակտիվ օգտագործող:
Այն տուրիստական ինֆորմացիան, որը ստեղծվում և տեղադրվում է գուգլում կամ նման այլ որոնողական համակարգերում, Չինաստանում հասանելի չեն: Գիտենք, որ գործարար կապերը հենց այնպես օդից չեն հայտնվում, իսկ տուրիզմը կարող է նպաստել, որ մարդիկ սկսեն իրար ավելի լավ ճանաչել: Բացի այդ, այն այցելուն, որ Հայաստանում կգտնվի մի շաբաթ կամ մի քանի օր, կարող է շատ արժեքավոր ինֆորմացիա տանել իր հետ: Տուրիստը կարող է դառնալ Հայկական բրենդի դեսպան, այն ապրանքների և այն ամենի համար, որ Հայաստանը կարող է առաջարկել»,- ասաց Նարե Արղուշյանը:
Չհեռանալով չաթից. Հայկական Text’n Pay Me ստարտափը հեշտացնում է ֆինանսական փոխանցումները
Հեղինակները ստեղծել են visitarmenia-ի չինական տարբերակը, որը գործում է հենց WeChat-ում: Ընթացքում կապ են հաստատել մի շարք չինական ընկերությունների հետ, հասկացել նրանց գործունեությունը, օտար բրենդների գովազդելու և չինական շուկա բերելու համար:
2021 թվականի մայիսին Digital Silk Road կենտրոնի չինական գրասենյակները սկսեցին գործել Սիան քաղաքում՝ քույր քաղաք Գյումրիում, նաև Տյանցզինում: Այս ամենը խթանում է Digital Pomegranate-ի աճի նոր ուղղությանը՝ չինական շուկայում:
«Երբ արտասահմանյան ընկերությունները ցանկանում են մտնել չինական շուկա, ներկայություն ունենալ, ինչ-որ բան վաճառել, արտահանում իրականացնել, թվային ներկայությունն ապահովելու համար նրանք բավականին լուրջ խոչընդոտների են հանդիպում: Տեխնոլոգիաները տարբեր են, մոտեցումներն՝ այլ, տեղում չինական ընկերություն վարձելը բավական խնդրահարույց է և թանկ: Այդ դեպքում նրանք կարող են դիմել մեզ: Մենք կկարողանանք մեր տեղական թիմն ունենալ, մեր ծառայություններն առաջարկել, գործակցել մեր գործընկերների հետ, պրոդուկտներ ստեղծել, ավելի շատ մոբայլ հավելվածներ ստեղծել ընկերությունների համար, որոնք Չինաստանում կաշխատեն»,- ասաց Նարե Արշուղյանը:
Չինաստանում ասացվածք կա, ասում են եթե WeChat չունես, ուրեմն մարդ չես
Oգտագործողի տեսանկյունից ամենակարևորն այն է, որ մեր ստեղծած ծրագիրը չեն ներբեռնում հեռախոս և այն ավելորդ տեղ չի զբաղեցնում:Այն instant app է, որը գործում է WeChat-ի էկոհամակարգում: Իսկ միջին վիճակագրական չինացին WeChat-ում չորս ժամ անցկացնում է:
«WeChat-ը ոչ միայն սոցիալական հարթակ է, այն իրենց ամեն ինչն է: Չինաստանում ասացվածք կա, ասում են եթե WeChat չունես, ուրեմն մարդ չես: Այն ունի վճարման համակարգ՝ WeChat pay, որ իրենք ամեն քայլին օգտագործում են»,- ասաց Նարե Արղուշյանը:
Այս պահին, մեր ստարտափ թիմում աշխատում են չորս հոգի:
«Չինացի աշխատող այս պահին չունենք, բայց Չինաստանում ունենք ֆրանսիական ընկերություն, որը լեզվի և հասանելության առումով մեզ համար ավելի հեշտ է գործակցել: Ուսումնասիրելով նաև չինացի զբոսաշրջիկների մարկետինգային օրացույցը, հասկանում ենք, որ ամենամեծ տոնն ու արձակուրդը իրենց համար հոկտեմբերին է լինելու: Նախատեսում ենք մինչև դա որոշ առաջխաղացումներ անել: Ենթադրում ենք, որ հոկտեմբերից իրենց ազգային տոներով պայմանավորված որոշ ամրագրումներ և հարցումներ կունենանք: Չինացիներին կապում ենք մեր տուր գիդերի հետ: Մենք առցանց ճամփորդական գործակալներ չենք, պարզապես մի հարթակ ենք, որտեղ չինացիներին կապում ենք ճամփորդական գործակալների հետ և այդպես կարողանում են իրենց տուրը կազմակերպել»,- ասաց Նարե Արղուշյանը:
Ըստ նախանշած բիզնես պլանի, ստարտափի համահիմնադիրները նախատեսում են, որ իրենց հարթակում ներկայացված լինելու և ծառայություններ առաջարկելու համար ընկերությունները պետք է եկամտի կիսման սկզբունքով աշխատեն: Օրինակ`հարթակում ներկայացնում են տուր կամ պրոդուկտ, լինի դա ռեստորան կամ զվարճանքների տեսքով, կամ հյուրանոցային ծառայություն: Այդ ծառայությունը ներկայացնելու համար համահիմնադիրները փոքր վարձավճարներ են նախատեսում, իսկ արդեն վճարումների ժամանակ, երբ անմիջական ամրագրումներ լինեն, կկարողանան եկամտի կիսման եղանակով աշխատել:
«Այս պահին սթարափը աշխատում է EIF Regional Matching Grants-ի մարզային համաֆինանսավորվող դրամաշնորհների հետ և Distrikt Studio-ի ֆինանսավորմամբ: Այսինքն, երկու տեղից ֆինանսավորում ունենք և մոտ վեց ամիս աշխատել ենք տվյալ ֆինանսավորման շրջանակներում: Distrikt ստուդիոն Գյումրիում մարզային ստարտափներ է ֆինանսավորում այս պահին: Մենք ստուդիոյի առաջին ստարտափներից մեկն ենք: Երբ district-ը պատրաստ լինի Գյումրիում, նախատեսում ենք թիմով տեղափոխվել»,- ասաց Նարե Արղուշյանը:
«Չինացի հաճախորդներին տուրիստական ծառայություն առաջարկելուց զատ, «Թվային մետաքսի ճանապարհ» կենտրոնում մենք սովորեցնում ենք չինարեն և բիզնես մշակույթը Գյումրիում՝ տեղացիների համար աշխատատեղեր ստեղծելու համար և Չինաստանում ու ամբողջ աշխարհում մեր տեխնոլոգիաների արտահանման միջոցով»,- ասաց Նարե Արղուշյանը:
Կարդացեք նաև՝ Տեխնոլոգիական Distrikt-ը Գյումրիում:
Տեխնոլոգիական և բիզնես ոլորտի այլ նորությունների ծանոթացե՛ք՝ միանալով մեր Տելեգրամյան ալիքին։
