Շվեդիան առաջ է անցել Իսլանդիայից՝ դառնալով աշխատող կանանց համար ամենաբարենպաստ երկիրը՝ համաձայն The Economist-ի 2025 թվականի ինդեքսի։ GCI ինդեքսը գնահատում է կանանց հավասար աշխատանքի հնարավորությունները OECD անդամ 29 երկրներում։
Առաջատար հնգյակում են Շվեդիան, Իսլանդիան, Ֆինլանդիան, Նորվեգիան և Պորտուգալիան։ Սկանդինավյան երկրները շարունակում են առաջատար դիրքեր զբաղեցնել՝ ապահովելով կանանց համար բարձր կրթություն, աշխատանքային հնարավորություններ և ղեկավար պաշտոններում առաջխաղացում։
Զեկույցի հիմնական ցուցանիշներն են՝
- Աշխատավարձի տարբերություն — կանանց և տղամարդկանց միջին աշխատավարձի տարբերությունը կազմում է 11.4%, որը վերջին տարիներին նվազել է, սակայն այժմ կայունացել է։
- Զբաղվածություն — կանանց զբաղվածության մակարդակը հասել է 66.6%, ինչը նախորդ տարվա 65.8%-ի համեմատ աճ է գրանցել։
- Քաղաքական ներկայացվածություն — կանայք զբաղեցնում են խորհրդարանական տեղերի 34%-ը: Նշանակալի առաջընթաց է գրանցվել Ճապոնիայում (10%-ից 16%) և Մեծ Բրիտանիայում (35%-ից 41%)։
- Կորպորատիվ ներկայացվածություն — կանանց բաժինը ընկերությունների ղեկավար կազմերում կազմում է 33%։ Այս ցուցանիշով առաջատարներն են Նոր Զելանդիան (48%), Մեծ Բրիտանիան (44%) և սկանդինավյան երկրները։
- Կառավարչական պաշտոններ — կանանց մասնաբաժինը կառավարման ոլորտում կազմում է 34%, իսկ առաջատարներն են Շվեդիան (43.7%), Լատվիան (43%) և ԱՄՆ-ն (42.9%)։
- Մայրության արձակուրդ — մայրության վճարովի արձակուրդի միջին տևողությունը կազմում է 31.6 շաբաթ։ ԱՄՆ-ն մնում է միակ OECD երկիրը առանց պարտադիր վճարովի ծնողական արձակուրդի։
Հետնապահներն այս տարի կրկին Ճապոնիան, Թուրքիան և Հարավային Կորեան են՝ աշխատաշուկայի ավանդական կարծրատիպերի և կանանց ցածր ներգրավվածության պատճառով։
Այստեղ կարող եք ծանոթանալ ամբողջական զեկույցին։
