Բժշկական ոլորտի ստարտափները հայկական Big Story VC-ի սիրելիներից են. վերջերս How2B-ն պատմեց Docus-ի մասին, իսկ հիմա հերթը 200 000 ԱՄՆ դոլար ներգրաված Sleep Doctor-ին է, որը լուծում է շատ կարևոր՝ քնի խնդիր:
Մեթյու Ուոքերի «Ինչու ենք մենք քնում» գիրքը կարդալուց հետո Թաթուլ Աջամյանի մոտ միտք է առաջանում` օգնել քնելու խնդիր ունեցող մարդկանց:
«Գրքում բացատրվում է քնելու կարեւորությունը առողջության համար, եւ ինչպես է այն ազդում մարմնի վրա: Աշխարհում չկա ոչ մի կենդանի օրգանիզմ, որ չի քնում, չնայած էվոլյուցիայի ընթացքում մնացել են ամենաուժեղները։
Ինձ շատ հետաքրքրեց այդ թեման, սկսեցի քննարկել ընկերներիցս Արմեն Վերդյանի հետ: Նա հայ է, բայց ծնվել ու մեծացել է Փարիզում, աշխատում է այնտեղ և իր հաճախորդներից մեկի բիզնեսը նույնպես ուղղված է քնի խանգարումները լուծելուն»,- պատմեց Թաթուլ Աջամյանը:
Ինչ խնդիր է թիրախավորել Sleep Doctor-ը
Վերդյանի փարիզյան հաճախորդը ուներ ընկերություն, որը քնելու խանգարում ունեցող մարդկանց տրամադրում էր սիփափ (c-pap) սարքավորում, որը լուծում է խնդիրը: Կազմակերպության եկամուտը գերազանցում է մի քանի հարյուր մլն եվրոն: Բայց դա դեռ չի նշանակում, որ բոլոր խնդիրները լուծված են, և այդ ոլորտում բիզնես հնարավորություններ չկան:
«Մենք սկսեցինք քննարկել այդ ոլորտի խնդիրները: Պարզվեց, որ Ֆրանսիայում դիագնոստիկայի պրոբլեմ կա: Աշխարհում մոտավորապես մեկ միլիարդ մարդ տառապում է քնի հետ կապված տարատեսակ խնդիրներով, որից ամենատարածվածն անքնությունն է: Սակայն, նրանց մոտ 80 տոկոսը դիագնոստիկա չի անցել։ Այդ դիագնոստիկան տևում է 3-6 ամիս։ Իսկ մենք կարողացանք առաջարկել պրոդուկտ, որը դիագնոստիկան անում է 2-3 շաբաթվա ընթացքում, եւ կարևորը, որ դա անվճար է պացիենտի համար՝ օգտագործելով Ֆրանսիայի բժշկական ապահովագրության համակարգը»,- ասաց Թաթուլ Աջամյանը:
Պարզվեց, որ դիագնոստիկայի խնդիրը շատ սուր է: Թաթուլ Աջամյանին հատկապես տպավորել է մի կնոջ դեպք, որը տարիներ շարունակ տառապել է կլինիկական դեպրեսիայով և պարբերաբար հայտնվել հիվանդանոցում: Հետագայում, քնի ժամանակ նրա խռմփոցից բժիշկները պարզել են, որ նրա մոտ ընդամենը քնի ապնոէ (sleep apmea) է, որը հնարավոր է հեշտությամբ կարգավորել C-pap սարքով:
Քնի ապնոէ (Sleep Apmea) – քնի խանգարում, որը բնորոշվում է քնի ընթացքում շնչառական դադարներով կամ անբավարար շնչառական էպիզոդներով։ Յուրաքանչյուր կանգ տևում է մի քանի վայրկյանից մինչև մի քանի րոպե և մեկ գիշերվա ընթացքում այդպիսի դրվագները կարող են կրկնվել բազմիցս։ Առավել տարածված է շնչականգերի զուգակցումը բարձրաձայն խռմփոցով։ Շնչառության վերականգնումը ուղեկցվում է խեղդոցի կամ փնչոցի նման ձայներով։ Քանի որ խանգարումը նպաստում է քնի ընդհատումներին, այս խնդրով հիվանդները սովորաբար քնկոտ են լինում կամ ամբողջ օրը ունենում են հոգնածության զգացում։ Երեխաների մոտ քնի ապնոէի առկայությունը կարող է բերել ուսուցողական պրոցեսի ընթացքում խնդիրների առաջացման կամ հիպերակտիվ վարքի դրսևորման։
Հենց դիագնոստիկայի խնդրի լուծումն էլ դարձավ ստարտափի մեխերից մեկը: Դիագնոստիկային պետք է հաջորդի բժշկի խորհրդատվությունը և անհրաժեշտության դեպքում c-pap սարքի մատակարարումը, և խնդիրը լուծված է: Անհրաժեշտ է ուղղակի այս շղթան ամբողջացնել և ավելի հեշտ, հասանելի դարձնել, ինչն էլ լուծում է Sleep doctor-ը:
«Մենք ստեղծեցինք համակարգ, որով մարդը կկարողանա այս ամենը կապել իրար մոտավորապես 30 անգամ արագ, քան նախկինում էր, ու նաեւ հեշտանա պրոցեսը տանը կազմակերպելը»,-պատմում է Աջամյանը:
Եզակի գործիք product management-ի համար. Leanbe-ն շուտով թողարկելու է ծրագրի 2-րդ տարբերակը
Ինչպես է աշխատում Sleep Doctor-ը
«Sleep doctor-ը կայք է, որտեղ կարդում եք քնելու պրոբլեմների մասին, հասկանում եք՝ արդյո՞ք դուք ունեք խնդիր թե ոչ, թեստ եք հանձնում, որը տեւում է մոտավորապես 2,5 րոպե: Թեստը միջինում 15 հարցից է բաղկացած։ Արդյունքում մենք կարողանում ենք բավական ճիշտ գնահատել՝ դուք քնի ապնոէի ռիսկ կամ հակվածություն ունե՞ք, թե՞ ոչ»,-ներկայացնում է ստարտափի համահիմնադիրը:
Եթե հետազոտվողն ունի հիվանդության ռիսկ, ապա կայքում առաջարկում են կոնսուլտացիա անել բժշկի հետ՝ տեսակապով: Մասնագետի հետ խոսելուց հետո, նա որոշում է, սիփափ սարքավորումն առաքել պացիենտի բնակարան, որով անձը քնում է մեկ գիշեր, ինչին հաջորդում է ևս մեկ կոնսուլտացիա, որից հետո անցնում են լիարժեք բուժման:
Sleep Doctor-ի շղթան
- 3 րոպեանոց առցանց հարցաշարի լրացում
- տեսակապով խորհրդատվություն բժշկի հետ
- մեկ գիշեր հետազոտություն c-pap սարքով
- բուժում
Քնի ապնոէ ունեցող մարդը քնելուց առաջ պարտադիր պետք է կրի այդ սարքավորումը: Թաթուլ Աջեմյանը բացատրում է, որ հիվանդության բուժման երկրորդ տարբերակը վիրահատական միջամտությունն է, բայց ոչ բոլորին է դա ցուցված: Ու այժմ հիվանդությունն ունեցողների մեծ մասը՝ 90 տոկոսից ավելին բուժվում է հենց այդ թերապիայով՝ դիմակով են քնում։ Sleep Doctor-ն էլ գործընթացը դարձրել է հեշտ և հասանելի:
Ֆրանսիա, Հայաստան, ԱՄՆ. Sleep doctor-ի ներկան ու ապագան
Ստարտափն աշխատում է Ֆրանսիայի չորս քաղաքներում՝ Փարիզ, Բորդո, Ստրասբուրգ եւ Լիոն, որտեղ մոտ 30 հազար մարդ անցել է Sleep doctor-ի թեստով և մոտ 1000 հոգի էլ արդեն բժշկի հետ կոնսուլտացիա է իրականացրել:
Թիրախային մյուս շուկան Միացյալ Նահանգներն են: Քանի որ հիվանդությունը մեծ մասամբ գիրության հետ է կապված, ԱՄՆ-ում բնակչության 25%-ն, այսինքն՝ յուրաքանչյուր չորրորդ մարդն ունի այդ խնդիրը:
Հարթակի մոդելի հետաքրքիր կողմերից մեկն այն է, որ հիմնադիրները բժշկական որևէ գիտելիք չունեն, և այդ ոլորտում որևէ նոր բան չեն բացահայտել: Թեստը վերցրել են մասնագետներից և ադապտացրել, բուժման համար անհրաժեշտ սարքավորումները ևս նախկինում էլ կային: Ուղղակի, նրանք նկատել են այդ գործընթացի բաց ու խնդրահարույց հատվածները, որը և դարձել է բիզնես մոդելի հիմքը:
Հարթակի համար մեծ առավելություն է ստեղծում այն, որ Ֆրանսիայում առողջապահական ապահովագրության հաշվին հնարավոր է դարձել ծառայությունները մարդկանց մատուցել անվճար: Թաթուլ Աջամյանն ասում է, որ այլ երկրում այս հարթակը ներդնելու պարագայում պայմանների փոփոխություններ կլինեն:
Հարթակը գործում է արդեն մեկ տարի: Թիմի մի մասը Ֆրանսիայում է, մյուս մասը՝ 6 աշխատակից, Հայաստանում: Հարթակի գլխավոր նպատակն է դառնալ առաջին թվային քնելու կլինիկան, այսինքն՝ պացիենտը սկսում է կայքից կամ հավելվածից, բայց հետագայում իրեն կարող է մատուցվել ամբողջական բուժում՝ սարքավորումների և այլ անհրաժեշտ նյութերի առաքման միջոցով: Հիմնական ու վերջնական նպատակն է՝ լուծել քնելու հետ կապված բոլոր խնդիրները:
Տեխնոլոգիական և բիզնես ոլորտի այլ նորությունների ծանոթացե՛ք՝ միանալով մեր Տելեգրամյան ալիքին։
