ՀՀ տնտեսական ակտիվության ցուցանիշը 2024-ի փետրվարին նախորդ տարվա փետրվարի նկատմամբ աճել է 16,3%-ով, տեղեկանում ենք ՀՀ վիճակագրական կոմիտեի հրապարակած տվյալներից։ 2024-ի հունվար-փետրվարին տնտեսական ակտիվության ցուցանիշի աճը նախորդ տարվա նույն ժամանակահատվածի նկատմամբ կազմել է 13,6%։
Ոլորտային ամենամեծ աճն արձանագրվել է արտաքին առևտրաշրջանառությունում, որի ծավալը 2024 թվականի փետրվարին նախորդ տարվա փետրվարի համեմատ աճել է 2,2 անգամ (հունվար-փետրվարը նախորդ տարվա նույն ժամանակաշրջանի համեմատ՝ 2 անգամ): Ընդ որում արտահանման ծավալն աճել են 2,9 անգամ (հունվար-փետրվարի համեմատությամբ՝ 2,6 անգամ), իսկ ներմուծման ծավալը՝ 79,9%-ով (հունվար-փետրվարի համեմատությամբ՝ 73,2%-ով)։ Ներմուծման և արտահանման տարբերությունը 2024-ի փետրվարին բացասական է եղել։
Արդյունաբերական արտադրանքի ծավալը 2024-ի փետրվար ամսին 2023-ի նույն ժամանակաշրջանի համեմատ աճել է 36,4 տոկոսով, ներքին առևտրի շրջանառությունը՝ 28,3 տոկոսով, շինարարությունը՝ 11,7 տոկոսով: Նախորդ տարվա փետրվարի նկատմամբ աճել է նաև ծառայությունների ծավալը՝ 6%-ով։
Նվազել են սպառողական գների ինդեքսը (1,7%-ով), արդյունաբերական արտադրանքի գների ինդեքսը (0,6%-ով), էլեկտրաէներգիայի արտադրությունը (3,1%-ով)։
2024-ի հունվար-փետվար ամիսների փոփոխությունը նախորդ տարվա նույն ժամանակաշրջանի համեմատ կազմել է՝
- արդյունաբերական արտադրանքի ծավալ՝ 28,9% աճ,
- ներքին առևտրի շրջանառությունը՝ 24,1% աճ,
- շինարարություն՝ 10,8% աճ,
- ծառայությունների ծավալ՝ 5,2% աճ,
- սպառողական գների ինդեքս՝ 1,3% նվազում,
- արդյունաբերական արտադրանքի գների ինդեքս՝ 0,4% նվազում,
- էլեկտրաէներգիայի արտադրություն՝ 4,9% նվազում։
Կարդացեք նաև՝
- Հայաստանն 82-րդն է աշխարհի ամենաերջանիկ երկրների ցանկում
- ՊԵԿ-ի կողմից գործարկվել է ֆիզիկական անձանց էլեկտրոնային ծառայությունների միասնական համակարգը
Բիզնես և տեխնոլոգիական ոլորտի նորությունները բաց չթողնելու համար միացե՛ք How2B-ի Տելեգրամյան ալիքին։
