-0.9 C
Yerevan
Wednesday, February 1, 2023

CAIMAN. Հեռահաղորդակցության մասնագիտական գործիք՝ մշակված Հայաստանում

CAIMAN-ը հեռահաղորդակցության ոլորտում ցանցային կառավարման համակարգ է, որն իր նոր մոտեցումներով գալիս է փոխարինելու շուկայում օգտագործվող մի քանի ծրագրերի: Նեղ ոլորտային այս համակարգը թույլ է տալիս ավտոմատացման միջոցով ավելի արդյունավետ դարձնել աշխատանքը, օրինակ՝ դեռ սկզբնական փուլում հայտնաբերել և լուծել ցանցի հետ կապված առկա խնդիրները, կամ ցանցի կառուցումը իրականացնել ամենաշահավետ ձևով, նվազագույն կորուստներով:

CAIMAN-ը հեռահաղորդակցության օպերատորների (տելեկոմ) համար նախատեսված կոմպլեքս գործիք է, որն առաջարկում է լուծումներ ամենատարբեր խնդիրների համար՝ սկսած աշխատողների մուտքի ու ելքի հարցերից, վերջացրած ավելի գլոբալ խնդիրներով՝ օրինակ սերվերում ինչ սարքավորումներ կան, ինչին է միացրած և ինչ թողունակությամբ: Իսկ այս ամենի հիմքը կազմում է քարտեզագրությունը:

CAIMAN-ի համահիմնադիրները երկուսն են՝ Տիգրան Վարդանյանը և Տիգրան Գրիգորյանը: How2b.am-ը զրուցել է Տիգրաններից Վարդանյանի հետ:

«Գաղափարը ծագել է մոտ ութ տարի առաջ երբ աշխատում էի հեռահաղորդակցության ոլորում: Աշխատելուս ժամանակ տեսա, որ շատ ինտերֆեյսեր կան, բազում ծրագրեր էին օգտագործում, որն իրականում ավելի շատ էր բարդացնում աշխատողի կյանքը, քան օգնում: Հասկանում էի, որ այդ ծրագրերից ոչ մեկը նախատեսված չէ տելեկոմի համար: Օրինակ google քարտեզը չի ստեղծվել, որպեսզի տելեկոմն օգտագործի, այն նախատեսված է ցանկացած մեկի համար, ում անհրաժեշտ է քարտեզ»,- ասաց Տիգրան Վարդանյանը:

Հենց այդ ժամանակ Տիգրանի մոտ միտք առաջացավ գործիքակազմը մաքսիմալ մոտեցնել տելեկոմի պահանջներին ու ստանալ ավելի հարմարավետ պրոդուկտ, գլխավորը՝ մեկ հիմնական ինտերֆեյսով:

«Մի քանի կտոր սարքեցի հստակ մեր ստորաբաժանման համար, հետո այնպես ստացվեց, որ ստորաբաժանման ՕԳԳ-ն բավականին բարձրացավ: Տնօրինությունը տեսավ, գործիքի մի կտորն այլ բաժիններում ներգրավվեց ու որոշակի խնդիրներ փոքր-փոքր կտորներով լուծումներ ստացան»,- ասաց Տիգրանը:

CAIMAN. Հեռահաղորդակցության մասնագիտական գործիք՝ մշակված Հայաստանում
Տիգրան Վարդանյանը

Հեռահաղորդակցության ոլորտում աշխատանքից դուրս գալուց հետո, Տիգրանը կենտրոնացավ առանձին պրոդուկտի վրա, որը կլինի քարտեզագրության վրա հիմնված տելեկոմ ընկերությունների համար նախատեսված համակարգ: Այն իր մեջ կներառի ticket management, CRM համակարգ, այն ամենն, ինչ տելեկոմն օգտագործում է իր առօրյայում, և որի հիմքը քարտեզագրությունն է:

«Տելեկոմը Ա կետից Բ կետ մալուխներ է անցկացնում, հետո դրանք կառավարում, պլանավորում, թե ոնց պետք է բաժանորդային կապուղիները կառուցվի կամ ինչ զարգացման ճանապարհներ ունի: Այս ամենն ամբողջովին հիմնված է քարտեզագրության վրա: Հայաստանում կան տելեկոմ ու օպերատորներ, որոնք արդեն օգտվում են մեր պրոդուկտից ու մեր միջոցով են իրենց քարտեզագրությունն անում»,- ասաց Տիգրանը:

CAIMAN-ը մինչև հազար բաժանորդ ունեցող փոքր ընկերություններին իր ծառայությունը տրամադրում է անվճար: Նպատակն է, խթանել այդ տեսակ ընկերությունների զարգացմանը: Հայաստանում CAIMAN-ից օգտվող հեռահաղորդակցության օպերատորի համար գործում է արտոնյալ պայմաններ:

«Այդ ընկերությունները հետագայում կարող են դառնալ մեր հաճախորդը: Երբ ցանցը մեծանա, ֆիզիկապես անհնար կլինի հիշել, թե որտեղով ինչ մալուխ է անցնում, իսկ մեկ մալուխի միջով էլ կարող է մինչև ութ հարյուր մանրաթել անցնել: Քանի որ այս ամենը մեծ ցանցի դեպքում հիշելն անհնար է, օգնության ենք հասնում մենք՝ մեր պրոդուկտով»,- ասաց Տիգրան Վարդանյանը:

Կարդացե՛ք նաև՝

CAIMAN-ի հաճախորդները միջին և խոշոր տելեկոմ ընկերություններն են: Հայաստանում չկան խոշոր օպերատորներ, իսկ մեր երկիրն այն քիչ երկրներից է, որ իր ամբողջ տարածքում մանրաթելային կապուղի ունի (տարածքային իմաստով): Հայաստանից դուրս, Վրաստանում, Եգիպտոսում, Շվեյցարիայում CAIMAN-ը հետաքրքրություն է առաջացրել: Նրանց հետ համահիմնադիրները մշտական կապի մեջ են, իրենք էլ պարբերաբար տեղեկանում են հայկական CAIMAN-ի թարմացումներին: Պատրաստ են առաջարկներ լսել, երբ պրոդուկտը վերջնական շուկա դուրս գա: Այս պահին այն բետա փորձարկման փուլում է:

«Պրոդուկտի յուրահատկությունն այն է, որ մեր լոյալությունը շատ բարձր է, այսինքն մենք photo editor չենք, որ ցանկացած վայրկյանից գտնեն նորը, հինը փակեն և անցնեն առաջ: Եթե սկսեն մեր ծրագրով կառուցել իրենց ցանցը, ապա հետո նոր տեղից սկսելը շատ բարդ կլինի: Սկզբում թողնում ենք, որ աշխատեն մեր ծրագրով, ապա ինչ-որ սահման հատելուց հետո, ծառայությունը դառնում է վճարովի»,- ասաց Տիգրանը:

Ընկերությունը մեկ տարի առաջ ստացած ներդրումով արդեն իսկ ձևավորել է կայացած թիմ: Բոլոր 13 աշխատակիցներն աշխատում են Հայաստանում, նրանց մեծ մասը ծրագրավորողներ են: Համահիմնադրի խոսքով, այս պահին, իրենց միակ խնդիրը, որակյալ կադրերի ներգրավումն է:

«Կան ստարտափ ընկերություններ, որոնք ձգտում են մրցանակի: Մեր նպատակները փուլային են, դրանից առաջինն այն է, որ ավարտուն տեսքի հասցնենք մեր պրոդուկտը առաջիկա վեց ամսում: Դրանից հետո պետք է թիրախային շուկան գրավենք, մասնավորապես՝ Աֆրիկայի շուկան, քանի որ օպտիկական ցանցերն այնտեղ նոր են զարգանում: CAIMAN-ն աշխարհի մակարդակով սպեցիֆիկ պրոդուկտ է, իսկ մրցակիցների պրոդուկտները տարիքային առումով մեծ են անգամ CAIMAN-ի համահիմնադրից»,-ասաց Տիգրանը:

CAIMAN-ն առաջարկում է նոր ու հետաքրքիր լուծումներ, ըստ որի կկարողանա մտնել արդեն իսկ մրցակիցներով շուկա ու ձեռք բերել պոտենցիալ հաճախորդներ: Պրոդուկտը տեխնիկապես պատրաստ է աշխատել ամենավերջին տեխնոլոգիաներով:

Կարդացե՛ք նաև՝ «Հայաստանում ես գտա թիմ՝ լավագույն հնարավորություններով». Benivo-ի տնօրեն

Տեխնոլոգիական և բիզնես ոլորտի նորությունները՝ մեր Ֆեյսբուքյան էջում։

Կարդացե՛ք նաև

spot_img
spot_img

Վերջին նորությունները

CAIMAN. Հեռահաղորդակցության մասնագիտական գործիք՝ մշակված Հայաստանում
Նանէ Հայրապետյան
Բազմաթիվ ինչուների պատասխանի հետևից գնալու համար, նախ ընտրեցի ԵՊՀ ժուռնալիստիկայի ֆակուլտետի ճանապարհը, հետո քաղաքական ինչուները տարան Պետական Կառավարման Ակադեմիա ու ստացա քաղաքագիտության մագիստրոսի կոչում: Բարև Ձեզ, ես Նանէ Հայրապետյանն եմ, այս հարթակում պատմում եմ ՏՏ-ի, բիզնեսի և ինովացիաների մասին: Եթե ունեք հարցեր կամ թեմաներ, որոնց կուզեք որ անդրադառնանք, գրեք ինձ հետևյալ հարթակններում: