13.1 C
Yerevan
Monday, October 3, 2022

2021 թվականի լավագույն 7 սոցիալական մեդիա արշավները

Հաշվի առնելով սոցիալական մեդիայի ներգրավվածությունն այսօր՝ բրենդների սոցիալական մեդիայի ալիքներն ավելին են, քան պարզապես հետևորդները, երկրպագուները կամ լուսանկարները: Յուրաքանչյուր սոցիալական արշավ և գրառում բիզնեսի համար հնարավորություն է, ինչպես նաև կարևոր պատասխանատվություն՝ ցույց տալու իրենց բիզնեսի բնույթն ու վերաբերմունքը այս կամ այն հարցի շուրջ:

Ամբողջ աշխարհում 13 և ավելի բարձր տարիքի բնակչության գրեթե երկու երրորդն այժմ ակտիվ է սոցիալական ցանցերում, միջինում յուրաքանչյուր անձ ունի 9 հաշիվ: Ներգրավված հետևորդներն իրենց սիրելի ապրանքանիշներին հետևելու համար օգտագործում են տարբեր հարթակներ՝ Instagram-ից և Facebook-ից մինչև YouTube, Twitter ու TikTok։

Բայց օգտատերերը պարզապես չեն հետևում սոցիալական մեդիային թարմ նորությունների համար, նրանք փնտրում են արժեքներ, ժամանց, փորձում են ընդլայնել իրենց աշխարհայացքը։ Բրենդները, որոնք հասկանում են, թե ինչպես այս գործոններին համապատասխան բովանդակություն ստեղծել, հնարավորություններ ունեն ստեղծելու սոցիալական մեդիայի առավել գրավիչ արշավներ:

Սոցիալական մեդիայի ամենահաջող արշավն այն է, որը մտածված ստեղծվել է թիրախային լսարանին հասնելու համար, հույզեր է առաջացրել և բերել է ճանաչելիության կամ վաճառքների աճի:

Եկեք ուսումնասիրենք անցնող տարվա սոցիալական մեդիա մարքեթինգի համաշխարհային ամենաուշագրավ արշավները, և հասկանանք, թե ինչու են դրանք այդքան լավ աշխատել: Սա նաև ոգեշնչման աղբյուր կարող է հանդիսանալ մարքեթոլոգների համար, ովքեր արդեն մյուս տարվա արշավներն են ծրագրում։

1․ Լեգո․ «Վերակառուցի՛ր աշխարհը»/ «Rebuild the World»

2021 թվականի լավագույն 7 սոցիալական մեդիա արշավները

LEGO Group-ը վերջերս թարմացրել է իր 3-ամյա «Վերակառուցի՛ր աշխարհը» արշավը՝ իր YouTube ալիքում տեղադրելով 3 բոլորովին նոր, զվարճալի «ֆիլմեր»: Շարքի առաջին տեսահոլովակի հերոսը արտիստ Ալեքսա Միդին է, ով երեխաների հետ սյուրռեալիստական ​​գլուխգործոց է ստեղծում լեգոյով: Ալեքսան հայտնի է իր ստեղծագործություններով, որոնցում շատ են ներկայացվում ապագայի հեռանկարներ, ուստի տեսահոլովակը կենտրոնանում է այն բանի վրա, թե ինչպես երեխաները կարող են վերակառուցել իրենց գաղափարները յուրահատուկ արվեստի մեջ:

Նոր տեսահոլովակները վերափոխում են սկզբնական արշավի հիմնական հաղորդագրությունները՝ պատմելու նոր ձևաչափով և ցուցադրված արտիստի միջոցով, որ ոգեշնչում է երեխաներին ամբողջ աշխարհում: Նմանապես, 2-րդ դրվագում մրցանակակիր դերասան, գրող և երգիչ Բիլլի Փորթերը երեխաների հետ զրուցում է այն ​​մասին, թե ինչպես կարող են լեգոները ներշնչել ստեղծագործական և դրական տրամադրվածություն: Այս զրույցի միջոցով Բիլլի Փորթերը և երկու երեխաները կառուցում են բարդ լեգո թագ, որը հիմնական  ուղերձն է: Ի տարբերություն մարքեթինգային արշավների մեծ մասի, որոնք խանդավառ գովազդներ են, այս արշավի տեսահոլովակները ոգևորիչ են և ներկայացնում են բաց քննարկում արվեստագետների և երեխաների միջև երևակայության և արտահայտման ուժի մասին:

Նոր շարքը ակտիվորեն խրախուսում է երեխաներին ստեղծել իրենց նորարարական լուծումները և հաղթահարել տարբերություններն ու մարտահրավերները զվարճալի և կրթական տեսաբովանդակության միջոցով: Դրանից բացի, շարքը նաև ներկայացնում է տարբեր արվեստագետների և ակտիվիստների որպես ոգեշնչող մոդելներ. մի պրակտիկա, որը կարող է երեխաներին ծանոթացնել նոր գաղափարների, աշխարհայացքի և արտահայտման ձևերի հետ:

LEGO-ի 3 դրվագից բաղկացած տեսաշարը նրանց արդեն չափազանց հաջողված արշավի յուրահատուկ լրացումն է:

2․ Verizon. #WomenOwnWednesday

2021 թվականի սկզբին Verizon-ը հարցում պատվիրեց՝ COVID-19 համաճարակի ընթացքում կանանց աշխատուժի միտումները չափելու համար: Հարցումը ցույց տվեց, որ կանանց 68%-ի մոտ համաճարակի սկզբից աշխատաշուկայից հեռանալու հիմնական պատճառը գերհոգնածությունն ու սպառվածության զգացումն է: Ի պատասխան աշխատանքը լքող կանանց մեծ թվի՝ 2021 թվականի մարտի 10-ին Verizon-ը մեկնարկեց իր #WomenOwnWednesday արշավը:

2021 թվականի լավագույն 7 սոցիալական մեդիա արշավները

Այս հետաքրքիր նախաձեռնությունը նպատակ ուներ աջակցել կանանց պատկանող փոքր բիզնեսներին, ինչպես նաև կին ձեռներեցներին՝ Verizon-ի սոցիալական մեդիա հարթակներում մարտ ամսվա (Կանանց պատմության ամիս) յուրաքանչյուր չորեքշաբթի օրը ներկայացնելով մեկ կին ձեռներեցի։

Այս արշավը ոչ միայն ներկայացրեց փոքր, կանանց կողմից ղեկավարվող բիզնեսները Verizon-ի ավելի քան 230 հազար հետևորդներով լսարանին, այլև նախաձեռնությունը ներառում էր լրացուցիչ առավելություններ․ Verizon-ը կին սեփականատերերին և ձեռներեցներին տրամադրեց մենթորության ցանց, անվճար ռեսուրսներ և ուսուցում՝ օգնելով նրանց աճել և հաջողության հասնել:

Instagram-ի նոր արշավը նաև հրավիրեց հետևորդներին նշել և տեղադրել իրենց սեփական #WomenOwnWednesdays ձեռներեցներին, ինչը խթանեց ներգրավվածությունը՝ միաժամանակ ուշադրություն հրավիրելով կանանց կողմից ղեկավարվող շատ ավելի շատ բիզնեսների, քան ի սկզբանե արշավը կարող էր ներառել իրենց սեփական սոցիալական մեդիայում: Գրառումների այս ցանցն ավելի ընդլայնվեց Verizon-ի գործընկերների միջոցով, ինչպիսիք են Նյու Յորքում բնակվող դիզայներ Քրիստիան Սիրիանոն:

Իր սեփական #WomenOwnWednesdays գրառման միջոցով Քրիստիան Սիրիանոն նշեց ձեռքի պայուսակների և աքսեսուարների դիզայներ Վալերի Բլեզին: Ավելի շատ հաճախորդներ իրենց խանութ բերելուց բացի՝ հրապարակումը նաև ցույց տվեց Վալերի Բլեզի ազդեցությունը Նյու Յորքի տեղական համայնքի վրա, քանի որ բոլոր չմշակված նյութերը խանութի կողմից նվիրաբերվում են տեղական արվեստի ծրագրերին:

Verizon-ի #WomenOwnWednesdays-ն իր մեծ լսարանի և հայտնի գործընկերների միջոցով ստեղծել է օգտատերերի կողմից ստեղծվող բովանդակության անընդհատ ընդլայնվող ցանց, որը կարևորում է կանանց պատկանող բիզնեսները Կանանց պատմության ամսվա ընթացքում: Եվ այդ ամենը նրանց հետազոտության արդյունքների շնորհիվ, որոնք բացահայտեցին այն դժվարությունները, որոնց բախվում էին կանայք համաճարակի պատճառով:

3․ Dove. #PassTheCrown

2004 թվականին Dove-ն սկսեց իր #RealBeauty մարքեթինգային արշավը՝ պլատֆորմի առաքելությունը կենտրոնացնելով հավասարության, բնական գեղեցկության և մարմնի դրական կերպարի հիմնական արժեքների շուրջ: Այդ ժամանակից ի վեր Dove-ը դարձել է ոլորտի առաջատարը, երբ խոսքը վերաբերում է ապրանքանիշի  նոր արշավները սկզբունքային արժեքների հետ կապելուն: Անցյալ տարի Dove-ը մեկնարկեց ևս մեկ հիշվող սոցիալական մեդիա մարքեթինգային արշավ, որը կոչվում է #PassTheCrown՝ որպես CROWN (“Create a Respectful and Open World for Natural Hair”) Ակտը տարածելու իր առաքելության մի մաս, որը մազերի խտրականության դեմ օրենսդրություն է, որի նպատակն է վերջ դնել ռասայական մազերի խտրականությանը ԱՄՆ բոլոր նահանգներում:

2021 թվականի լավագույն 7 սոցիալական մեդիա արշավները

Համագործակցելով National Urban League-ի, Color of Change-ի և Western Centre-ի հետ՝ Dove-ը ստեղծեց քարոզարշավի #PassTheCrown հեշթեգը, որպեսզի շփվի աշխարհի տարբեր անկյուններից մարդկանց հետ և կիսվի նրանց անձնական մազերի պատմություններով և պայքարով: Ֆեյսբուքի, Թվիթերի և Ինստագրամի իր էջերում Dove-ը ուշադրություն հրավիրեց սև կանանց նկատմամբ և ավելի մեծ տեղեկացվածություն բերեց CROWN Act-ի («Ստեղծե՛ք հարգալից և բաց աշխարհ բնական մազերի համար») նկատմամբ:

Այս գրառումներում ներկայացված էին գեղեցիկ կանայք, ովքեր ընդունում էին իրենց բնական մազերը՝ առանց դատողությունների կամ խտրականության համար անհանգստանալու: Ավելին՝ #PassTheCrown բառախաղը զուգահեռ էր անցկացնում կանանց բնական մազերի և  վեհության և հպարտության հետ: Ճիշտ է, նպատակը CROWN Ակտի մասին իրազեկվածությունը բարձրացնելն էր, սակայն սոցիալական մեդիայի արշավը նաև խրախուսեց կանանց սիրել իրենց մազերը որպես յուրահատուկ թագեր:

Բրենդն ընդգծում է, որ կանանց 70%-ը իրենց ներկայացված չեն զգում մեդիայում և գովազդում, ուստի Dove-ը կառուցում է իրենց արշավները այդ կանանց ձայն և հարթակ տրամադրելու համար: Վերջնական արդյունքը. ավելի շատ հավասարություն և բազմազանություն լրատվամիջոցներում:

4․ ԱՀԿ. #COP26

Մարքեթինգային արշավները լուծում են տարբեր հրատապ խնդիրներ՝ սկսած համակարգային ռասիզմից մինչև COVID-19-ի ազդեցություն։ ԱՀԿ-ն օգտագործում է իր Instagram-ը՝ #COP26 քարոզարշավի միջոցով իրազեկելով ՄԱԿ-ի Կլիմայի փոփոխության 26-րդ համաժողովի (COP26) մասին: Մեծ Բրիտանիան հյուրընկալեց COP26-ը Գլազգոյում 2021 թվականի հոկտեմբերի 31-ից նոյեմբերի 12-ը, որտեղ բոլոր մասնակիցները միասին աշխատեցին և քայլեր ձեռնարկեցին Փարիզի համաձայնագրի և Կլիմայի փոփոխության վերաբերյալ ԱՄՆ շրջանակային կոնվենցիայի կատարման ուղղությամբ:

Աշխարհն արդեն տեսնում է մարդու կողմից առաջացրած կլիմայական փոփոխության ազդեցությունը: Ծովի մակարդակը բարձրանում է, անտառային հրդեհներն ավելանում են, և էքստրեմալ եղանակը դառնում է ստանդարտ, ոչ թե բացառություն: ԱՀԿ-ի #COP26 քարոզարշավի հրապարակումները պատկերում են այս «աշխարհը կրակի մեջ» մոտիվը Instagram-ի վառ անիմացիոն գրառումների միջոցով, որն արտացոլում է կլիմայական ճգնաժամի սրությունը: Զարմանալի կարմիր և նարնջագույն կրակային գրաֆիկների կողքին, հնչում է ազդանշան՝ գրավելու դիտողի ուշադրությունը և պահելու այն:

Բացի կլիմայի փոփոխության կարևոր փաստերով լցված վառ անիմացիոն գրառումներից՝ ԱՀԿ-ն իր քարոզարշավում ներառել է նաև անձնական տեսահոլովակներ, ինչպիսին է վերը նշվածը: Այս գրառման դեմքն է Դիարմիդ Քեմփբել-Լենդրումը, ով հեծանիվով Ժնևից Լոնդոն գնաց՝ որպես կլիմայի փոփոխության անհապաղ գործողությունների աջակցության ցուցադրություն:

Կլիմայի փոփոխությունը տագնապալի խնդիր է, որը լայնածավալ մտահոգություններ է առաջացրել մեր մոլորակի ապագա առողջության և անվտանգության համար: ԱՀԿ-ի արշավը չի խուսափում իրավիճակի ծանրությունից, բայց այն դեռևս հույսի և ոգեշնչման օրինակներ է տալիս անձնական պատմությունների միջոցով, ինչպիսիք են Դիարմիդ Քեմփբել-Լենդրումի հեծանվով արշավը դեպի Լոնդոն:

5․ McDonald’s. «BTS Meal»

McDonald’s-ը հայտնի անուն է ամբողջ աշխարհում: Իրականում, դժվար է պատկերացնել, որ մտնեք որևէ խոշոր օդանավակայան կամ քաղաք և չգտնեք խորհրդանշական ոսկե կամարները ինչ-որ տեղ։ Այնպես որ, դուք գիտեք, որ McDonald’s-ը սոցիալական մեդիայի ռազմավարության և գովազդային արշավների փորձագետ է:

2021 թվականի մայիսին McDonald’s-ը սկսեց իր տեսակի մեջ եզակի մարքեթինգային արշավ, որով համագործակցում էր BTS-ի՝ հարավկորեական բոյ-բենդի հետ, որը համաշխարհային ֆենոմեն է դարձել պարային-փոփ հիթերով, ինչպիսին է, օրինակ, «Butter»-ը:

Նրանց արշավը սկսվեց Facebook-ում, Instagram-ում և Twitter-ում խորհրդավոր գրառումներով, որոնցում ներկայացնում էր «BTS Meal»-ը այն երկրների ցանկի հետ, որոնք առաջարկելու էին նոր կոմբոն: Արշավն անմիջապես տարածվեց, քանի որ McDonald’s-ն օգտվեց BTS-ի համաշխարհային երկրպագուների հսկայական բազայի գնողունակությունից: Երիտասարդ հայտնիների հետ համագործակցելը նոր գաղափար չէ, բայց այս համագործակցությունը առանձնանում է համակորեական խմբին որպես հիմնական կենտրոնական կետ ընդունելով:

Միայն նրանց թվիթը հավաքեց ավելի քան կես միլիոն հավանում և 182 հազար ռեթվիթ: Բաղկացած լինելով 10 կտոր հավի մաքնագեթներից, երկու սոուսներից, ֆրիից և կոլայից՝ BTS Meal-ը հսկայական մարքեթինգային հաջողություն ունեցավ։ McDonald’s-ը BTS meal-ի գովազդման առաջին շաբաթվա ընթացքում ռեստորանային այցելությունների 12% աճ գրանցեց նախորդ շաբաթվա համեմատ:

2021 թվականի լավագույն 7 սոցիալական մեդիա արշավները

Բացի McDonald’s BTS Meal-ի արտադրանքի թողարկման քանակական հաջողությունից՝ նրա սոցիալական արշավը 2021 թվականին ասիացի արվեստագետներին ներկայացրեց անհրաժեշտ դրական լույսի ներքո: Համաշխարհային տնտեսական ֆորումի համաձայն՝ հակաասիական ատելության հողի վրա հանցագործությունները աճել են 169%-ով ԱՄՆ 15 խոշոր քաղաքներում: Սոցիալական լրատվամիջոցները չեն կարող վերջ տալ համակարգային ռասիզմին, բայց կարող են հասնել տարբեր համայնքներին և դրական ներկայացվածություն խթանել: BTS Meal-ի հաջողության շնորհիվ McDonald’s-ը շարունակել է համագործակցել BIPOC-ի ​​հայտնի մարդկանց հետ՝ ավելի շատ հատուկ կոմբո կերակուրներ պատրաստելու համար, օրինակ՝ ռեփեր Saweetie-ի հետ:

6․ Spotify. #FindYourFeels

2021 թվականի սեպտեմբերին Spotify-ը մեկնարկեց բազմալիքային ազդեցիկ արշավ, որ կրում է #FindYourFeels անունը, ուղղակիորեն ուղղված էր իր Gen Z լսարանին: Նրանց համար, ովքեր չգիտեն․ Pew Research-ը վերջերս դասակարգել է 1996 թվականից հետո ծնված ցանկացած մարդու որպես Gen Z-ի մաս:

Gen Z-ը ճանաչվում է որպես առանձնահատուկ եզակի լսարան, քանի որ մեծամասնությունը թվային բնիկներ են, որոնք քիչ բան են հիշում առանց սմարթֆոնների և WiFi աշխարհի մասին:

2021 թվականի լավագույն 7 սոցիալական մեդիա արշավները

Ըստ Spotify-ի՝ #FindYourFeels-ը նախատեսված է «աջակցելու Gen Z-ին արտահայտվելու»՝ ցույց տալով, թե ինչպես է երաժշտությունն օգնում երիտասարդներին գտնել իրենց: Այս արշավը ցուցադրեց տարբեր կերպարներ, այդ թվում՝ կույր հաշմանդամություն ունեցող ակտիվիստ Լյուսի Էդվարդսը, բանաստեղծ և նկարիչ Շաքիլ-Աարոն Քիթին, տրանսակտիվիստ Քենի Իթան-Ջոնսին և շատ այլ հայտնիների: Յուրաքանչյուրը կիսվել է կյանքի նշանակալից պահերի և երգերի մասին իր զգացմունքներով, որոնք իրենց մոտ հիշողություններ են արթնացնում կամ օգնում են անցնել դժվարությունների միջով: Այնուհետև այս տեսանյութերը տարածվեցին յուրաքանչյուր հերոսի սոցիալական մեդիայի ալիքով՝ TikTok-ից մինչև Instagram և Twitter: Բացի այդ՝ արշավը ցուցադրվել է գործընկեր կայքերում, ինչպիսիք են Popsugar-ը, COMPLEX-ը և SoleCollector-ը:

Վերը նշված Instagram-ի գրառման մեջ Քենի Իթան-Ջոնսը թվարկում է կարևոր երգեր, որոնք ոգեշնչել են նրան մասնագիտական ​​կյանքում և տրանսինքնաբացահայտման հարցում, այդ թվում՝ Candy, One Wish և We Got Love երգերը: Վառ անիմացիոն գրաֆիկայով և ենթագրերով տեսանյութը և՛ մոտիվացնող է, և՛ ուսուցողական, քանի որ նա կիսվում է իր սեփական պատմությունով:

Spotify-ի մոտ շատ լավ է ստացվում բազմալիք ապրանքանիշի մոտեցումը, որն ավելի ու ավելի կարևոր է դառնում, երբ փորձում ենք հասնել տեխնոլոգիական գիտելիքներ ունեցող, երիտասարդ Gen Z լսարանին: Համագործակցելով տարբե սոցիալապես ակտիվ և ընդգրկուն կերպարների հետ և նրանց տալով վերահսկողություն իրենց սեփական պատմվածքի վրա՝ Spotify-ը կարողանում է գովազդել իր հարթակը` փոխակերպելով ավանդական առևտրային ձևաչափը։

7․ TikTok. «Դուք պետք է տեսնեք դա»

2021 թվականի մարտին Նյու Յորքում գտնվող TikToker @samanthartsoe-ն վերբեռնեց մեկ րոպեանոց տեսանյութ՝ մանրամասն նկարագրելով իր լոգարանում հայելու հետևում գտած առեղծվածային անցքը: Այս տեսանյութը և դրա մի քանի հաջորդ թարմացումները սարսափեցրին և գրավեցին մարդականց սոցիալական ալիքներում, քանի որ այն տարածվեց է Facebook-ի, Twitter-ի, Instagram-ի և այլնի միջոցով: Առաջին տեսանյութից մեկ օր անց Curbed-ը ներկայացրեց պատմությունը, որը շատ բնակարանների վարձակալների ամենավատ մղձավանջն է:

@samanthartsoe

seriously never would I have expected to find this… and I documented all of it #mystery #fyp #nyc #secret #foryou #apartment #storytime

♬ Mysterious – Andreas Scherren

TikTok-ի տեսանյութերը հաճախ վիրուսային են դառնում՝ իրենց արագ և հեշտ սպառվող բնույթի պատճառով, սակայն ընկերությունը որոշեց վերցնել այս պատմությունը և գործարկել այն: Նրանք Publicis Groupe-ի Le Truc ստեղծագործական խմբի օգնությամբ նոր արշավ ստեղծեցին, որը կոչվում է «Դուք պետք է տեսնեք դա»՝ ընդգծելու հետաքրքիր վիրուսային տեսանյութերը, ինչպիսիք են առեղծվածային բնակարանների շարքը:

Այս հետաքրքիր տեսանյութում սոցիալական ցանցերի մի շարք օգտատերեր, հայտնի մարդիկ և վիրուսային TikTok կոնտենտ ստեղծողները հերթով պատմում են ավելի շատ տարօրինակ քան հորինված, բայց 100% ճշմարտացի պատմություն կնոջ մասին, ով լքված բնակարան է գտել իր լոգարանի հայելու հետևում: Զրույցներն ընդգրկում են տարբեր պարամետրեր և վայրեր՝ ընդօրինակելու այն, թե ինչպես են մարդիկ իրականում վիրուսային պատմություններ պատմում միմյանց իրական կյանքում: Արդյունքը զվարճալի, խելացի տեսանյութ է, որը ներքին կատակ է դառնում այն ​​օգտատերերի համար, ովքեր տեսել են բնօրինակ TikTok-ը և հրավիրող պատմություն նրանց համար, ովքեր դեռ պրոֆիլ չեն ստեղծել:

Եվ վերջում

Բարձրորակ բովանդակություն ստեղծելն ավելի դժվար է դառնում, քանի որ «բարձր որակի» սահմանումը շարունակում է զարգանալ:

Մի համատեքստում դա կարող է նշանակել հավաքել և տարածել օգտատերերի կողմից ստեղծած թեթև կամ նույնիսկ հիմար գրառումները: Մեկ այլ դեպքում դա կարող է նշանակել գիտության վրա հիմնված ուղեցույցի խտացում՝ համապատասխան գրաֆիկայի մեջ: Ընդհանուր առմամբ, սոցիալական լրատվամիջոցների օգտատերերը մեծացնում են ակնկալիքներն այն մասին, թե ինչ կարող է և պետք է իրականացնի սոցիալական մեդիայի արդյունավետ արշավը:

Ընտրելով, թե որ սոցիալական մեդիայի արշավներն ենք կարևորելու, մենք ընտրեցինք նրանք, որտեղ գտանք.

  • Իսկապես եզակի, թարմ պատկերացում ծանոթ ապրանքանիշի, ապրանքի, ծառայության կամ ոլորտի մասին:
  • Նրբորեն արտահայտված արժեքներ, որոնք արձագանքում էին իրենց լսարանի արժեքներին:
  • Մտածված հիշարժան փորձառություններ էկրանին և էկրանից դուրս:

Մեկնարկային կետ փնտրող ապրանքանիշերը կարող են օգտագործել վեբ և սոցիալական մեդիա վերլուծություն՝ հասկանալու բովանդակության տեսակները, որոնց իրենց լսարանը լավ է արձագանքում:

2021 թվականի մեր ընտրած լավագույն արշավները ցույց են տալիս, որ սոցիալական մեդիայում շատ լավ են աշխատել վիդեո գովազդները և հայտնիների անձնական պատմությունները, որոնք մարդկանց հուզում են կամ տարբեր ասոցիացիաներ են առաջացնում։

Դե ինչ, արդեն ունե՞ք նոր գաղափարներ։

Կարդացե՛ք նաև

spot_img
spot_img

Վերջին նորությունները

2021 թվականի լավագույն 7 սոցիալական մեդիա արշավները
Տաթևիկ Իսկաջյան
Ես Տաթևիկն եմ՝ How2B-ում SEO հոդվածների շարքի հեղինակը։ Թվային մարքեթինգում եմ արդեն մի քանի տարի։ Գտեք իմ պորտֆոլիոն Google-ի թոփ 5-ում